Astana-Qosshy baǵytyndaǵy jol-kólik oqıǵasyna kináli júrgizýshi 5 jylǵa bas bostandyǵynan aıyrylýy múmkin
ASTANA. QazAqparat - Búgin tańerteń Astana-Qosshy baǵytynda bolǵan jol-kólik oqıǵasyna kináli júrgizýshi 5 jylǵa deıin bas bostandyǵynan aıyrylýy múmkin. Bul týraly ІІD Ákimshilik polıtsııa basqarmasy basshysynyń orynbasary Sabyr Júsipbekov aıtty.
Onyń sózine qaraǵanda, Astana men Aqmola oblysynyń Qosshy eldi mekeni avtojolynda jol-kólik oqıǵasy oryn aldy. «KamAZ» bazasyna ornatylǵan kran solǵa qaraı burylar kezde qarsy kele jatqan 43-shi marshrýttaǵy Qosshy-Astana avtobýsyn ótkizbegen. Osynyń saldarynan qaqtyǵys oryn aldy. «KamAZ» júrgizýshisi avtokóligin basqara almaı, taǵy úshinshi mashınamen soqtyǵysty. JKO nátıjesinde tórt kólik qaqtyǵysyp, 16 adam zardap shekti, onyń úsheýi aýrýhanaǵa jetkizildi. 13 adamǵa medıtsınalyq kómek kórsetilip, olardyń barlyǵy úılerine jiberildi. Úsh adam aýyr halde jatyr. Onyń bireýi qazir es-tússiz jaǵdaıda, ıaǵnı bas súıegine zaqym kelgen, bul adamǵa ota jasalmaq. Sóz sońynda S.Júsipbekov osy JKO boıynsha mindetti túrde qylmystyq is qozǵalatynyn aıtty. Jol qozǵalysy erejesin buzǵan júrgizýshi Qylmystyq Kodekstiń 296 baby boıynsha úsh jyldan bes jylǵa deıin bas bostandyǵynan aıyrylýy múmkin.
