Astana kóshesine majar aqyny Shandor Petefıdiń esimi beriledi
Elordadaǵy jańa kóshelerdiń birine bıyl týǵanyna 200 jyl tolatyn majar aqyny Shandor Petefıdiń aty beriledi. Bul jaıynda Memleket basshysy Qasym-Jomart Toqaev Majarstan Premer-Mınıstri Vıktor Orbanmen Aqordadaǵy kezdesýden keıingi birlesken málimdemesinde aıtty, dep habarlaıdy Kazinform agenttigi.
«Majar úkimetiniń qoldaýymen sońǵy 10 jylda Qazaqstan stýdentterine bilim granttary bólinip keledi. Kóp jastarymyz Majarstannyń jetekshi joǵary oqý oryndarynda bilim alyp júr. Jańa ǵana osy baǵdarlamany jalǵastyrý jónindegi memorandýmǵa qol qoıyldy. Bul qujat bilim salasyndaǵy baılanysty odan ári tereńdetýge jol ashady. Bıyl majar halqynyń uly perzenti Shandor Petefıdiń týǵanyna 200 jyl toldy. Osyǵan oraı búgin Astanada jańa kóshege aqynnyń esimi beriledi. Biz kópjaqty dıplomatııany odan ári nyǵaıtýǵa erekshe mán beremiz», - dedi Qasym-Jomart Toqaev.
Buǵan deıin Aqordada Majarstan Premer-Mınıstrin qarsy alý saltanaty ótkenin jazǵan edik.
Qasym-Jomart Toqaev Vıktor Orbanmen kezdesý kezinde eki eldiń baýyrlastyq baılanysy týraly aıtty.
Eske salsaq, keshe keshke Vıktor Orbandy Astana áýejaıynda vıtse-premer Serik Jumanǵarın kútip alǵan bolatyn.
Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.
