Astana kóshesinde qarýmen júrgen adam ustaldy
ASTANA. QazAqparat - Astanada Ulttyq ulan jaýyngerleri qarýy bar adamdy ustady, dep habarlaıdy QazAqparat tilshisi.
Oqıǵa 24 tamyz kúni keshki saǵat 20.50 shamasynda elordanyń Saryarqa aýdanynda tirkelgen. Avtopatrýl bastyǵy serjant Janserik Áljanov qaramaǵyndaǵy patrýlder Medet Nurǵazın, Sultan Muhatov jáne júrgizýshi Azat Amanjolov qoǵamdyq tártip pen qaýipsizdik kúzeti kezinde Jeltoqsan kóshesi № 14 úı mańyndaǵy aǵashtar arasynda bir top adamnyń otyrǵanyn baıqaıdy. Jaǵymsyz ıis pen olardyń kúdikti áreketterine qarap, esirtki shegip otyr dep boljammen ulandyqtar dereý sol jaqqa baǵyt alady.
«Áskerılerdi kórip qalǵan álgiler jan-jaqqa qasha bastaıdy. Aýlalarǵa qaraı qashqan ekeýdiń biri jol-jónekeı qaǵazǵa oralǵan untaqty shashyp úlgeredi. Serjant Áljanov pen qatardaǵy Muhatov kóp uzamaı qashqyndardy qýyp jetip, urys tásilderimen ekeýin lezde quryqtaı qoıady. Bul ýaqytta Nurǵazın men Amanjolov úshinshi kúdiktiniń izine túsken bolatyn. Ulandyqtardan qashyp qutylmaıtynyn sezgen kúdikti oń qolymen shalbarynan tapansha shyǵarady. Alaıda, sarbazdar oqys áreketke jol bermeı zań buzýshynyń qolyndaǵy qarýdy qaǵyp túsiredi. Shapshań qımyly men ójettiginiń arqasynda sarbazdar qaýiptiń aldyn aldy», - dep habarlaıdy QR Ulttyq ulanynyń baspasóz qyzmeti.
Oqıǵa ornyna áskerı jasaq boıynsha kezekshi, jetekshi quram men jedel-tergeý toby shaqyryldy. Kýágerlerdiń qatysýymen qajetti saraptama-tergeý jumystary júrgizilip, onyń nátıjesinde eki kúdiktiniń qanynan kanabıoıd tabylǵan.
«Sarbazdar qarýly adamdy kóz ilestirmes jyldamdyqpen quryqtady. Balalarymyz ben nemerelerimiz oınaıtyn aımaqty qaýipsizdendirip, qaısarlyq tanytqany úshin olarǵa raqmetimdi aıtamyn! - deıdi kýágerlerdiń biri.
Aıta keterligi, avtopatrýl bastyǵy serjant Janserik Áljanov buǵan deıin de jaýyngerlik qyzmet babynda óziniń qyraǵylyǵy jáne biliktiligimen erekshelengen bolatyn. Naqtyraq aıtqanda, 27-shildede Áljanov bastaǵan jasaq Astananyń Respýblıka dańǵylynan 2017 jyldyń qańtarynan beri izdeýde júrgen kánigi alaıaqty fotorobotynan tanyp qalyp, quqyq qorǵaý organdaryna ustap bergen. Araǵa táýlik salyp Janserik janyndaǵy jaýyngerlerimen 3 jasar Darmın esimdi joǵalǵan balany taýyp, ata-anasymen aman-saý qaýyshýyna járdemshi boldy. Al 10 tamyz kúni qyraǵy serjant «Anor» meıramhanasy qyzmetkeriniń sómkesinen ámııan alyp qashqan uryny qolǵa túsirgen edi.
