Astana kóshelerine Sofııa jáne Marko Polo ataýyn berý usynyldy
ASTANA. KAZINFORM – Elordada qalalyq máslıhattyń kezekten tys sessııasynda Astana qalasynyń Tilderdi damytý jáne muraǵat isi basqarmasy MM basshysynyń mindetin atqarýshy Dosjan Isabek Astana qalasynda kóshe ataýlaryn berý boıynsha birqatar jańa usynys qaralyp jatqany jóninde aıtty.
Onyń sózinshe, búgin qoldanystaǵy zańnamalyq talaptarǵa sáıkes, bul usynystar qaıtadan tıisti komıssııanyń qaraýyna engizilgen.
– Usynystarǵa sáıkes, Nura aýdanynda ornalasqan jobalyq ataýy E-754 kóshesine «Sofııa» ataýyn berý usynylyp otyr. Buǵan deıin Bolgarııa astanasy Sofııa qalasynda ortalyq kóshelerdiń birine «Astana» ataýy berilgen bolatyn. Sol kósheniń uzyndyǵy shamamen bir shaqyrymnan assa, Astanada usynylyp otyrǵan kóshe uzyndyǵy 535 metrdi quraıdy. Bul aýmaqta «Hılton» qonaqúıi, «Jer jáne adam» ulttyq mýzeıi sııaqty mańyzdy nysandar ornalasqan, - dedi ol.
Budan bólek Dosjan Isabek ekinshi usynystyń Italııamen baılanysty ekenin atap ótti.
– Turan dańǵylynan bastalyp Qabanbaı batyr dańǵylyna deıin sozylatyn, «Astana Arena» sport kesheni men «Alaý» muz aıdynynyń saraıy arasyndaǵy ataýsyz kóshege Marko Polo ataýyn berý qarastyrylyp otyr. Bárimiz biletindeı, Marko Polo – XIII-XIV ǵasyrlarda ómir súrgen venetsııalyq kópes ári saıahatshy, Azııa týraly qundy geografııalyq jáne tarıhı derekter qaldyrǵan tulǵa, - dedi mekeme basshysynyń mindetin atqarýshy.
Usynysty qoldaýshylar mundaı sheshim halyqaralyq mádenı baılanystardy nyǵaıtýǵa jáne ózara qurmet prıntsıpterin ilgeriletýge yqpal etetinin atap ótedi.
Eske salaıyq, buǵan deıin Astanadaǵy LRT-ǵa «Tarlan Astana» ataýy berilýi múmkin ekeni jaıly jazdyq.
