Astana kóshelerine ne sebepti jańbyr sýy jınalyp qalady
ASTANA. KAZINFORM — Astana qalasynyń kommýnaldyq sharýashylyǵy basqarmasy resmı saýalymyzǵa joldaǵan jaýabynda shahardaǵy nóser káriz júıesi jáne onyń qýaty men múmkindikteri jóninde málimdedi.
— Astana qalasynyń nóserli káriz júıesine 20 tazartý qurylysy, 1 jınaqtaýshy toǵan jáne nóserli, drenajdyq jáne aryq-lotok jelileriniń 621,6 km magıstraldyq kollektorlary kiredi. Qoldanystaǵy ınfraqurylym 20,1 myń gektardan astam aýmaqtaǵy jerústi aǵyndy sýlardy burýdy qamtamasyz etedi. Sonymen qatar, qurylys tyǵyzdyǵynyń joǵary bolýyna jáne qubyrjoldaryn júrgizýge bos aýmaqtardyń bolmaýyna baılanysty nóserli káriz jelilerin barlyq aýmaqta tehnıkalyq turǵydan júrgizý múmkin emes, — delingen habarlamada.
Vedomstvo málimetinshe, QR Qurylys normalaryna sáıkes, jaýyn-shashyn 20 mınýttan artyq quıyp jaýǵanda, kóshelerge ýaqytsha sý jınalýy qalypty qubylys sanalady. Alaıda joldardaǵy jaýyn sýy 2-4 saǵat ishinde soryp alynyp, kósheler tazartylýy tıis.
Sonymen qatar, basqarma kóshelerge sý tolǵan jaǵdaıda mamandar qalaı jumys isteıtini túsindirdi.
— Qatty jańbyr jaýǵan jaǵdaıda onyń saldaryn joıý jáne jınalǵan sýdy soryp shyǵarý úshin qajet bolǵan jaǵdaıda kommýnaldyq qyzmetterdiń arnaıy tehnıkasy men tıisti avarııalyq brıgadalary tartylady. Tartylatyn tehnıka men jumysshylardyń sany jaýyn-shashyn kólemine, sý basqan ýchaskelerdiń sany men aýmaǵyna, sondaı-aq qalyptasqan jedel jaǵdaıǵa qaraı aıqyndalady. Jekelegen jaǵdaılarda qalanyń birneshe ýchaskesinde bir mezgilde sý basý jaǵdaılary týyndaǵan kezde qosymsha arnaıy tehnıkany tartý qajettiligi týyndaýy múmkin. Osyǵan baılanysty barlyq ýchaskelerde jumystardy bir ýaqytta júrgizý úshin qolda bar kúshter men quraldar jetkiliksiz bolýy yqtımal. Sýdy soryp shyǵarý jáne sý basý saldaryn joıý jumystary aldymen neǵurlym problemaly ýchaskelerde júrgizilip, qajet bolǵan jaǵdaıda tehnıka men jumys kúshteri keıinnen qaıta bólinedi, — delingen resmı jaýapta.
Aıta keteıik, buǵan deıin Astana kóshelerin sý basqan soń, sý sorý jumystary qalaı júrgizilip jatqanyn jazǵanbyz.
