Astana kóshelerindegi káriz júıesi jańartyla ma
ASTANA. KAZINFORM – Ónerkásip jáne qurylys mınıstrligi Astanada nóser jaýynnan keıin keıbir kóshelerdi sý basýyna baılanysty elordanyń káriz júıesin jańǵyrtý máselesine túsinikteme berdi.
Eske salaıyq, 21–23 shilde aralyǵynda elordada shelektep jańbyr tókti. Nóserden keıin turǵyndar qalanyń birqatar kóshesi men aýdandaryn sý basqany jóninde shaǵymdanyp, áleýmettik jelige vıdeolaryn jarııalaǵan bolatyn.
Osyǵan baılanysty Úkimettegi brıfıng barysynda jýrnalıster vedomstvo ókilderinen «Energetıka jáne kommýnaldyq sektorlardy jańǵyrtý» ulttyq jobasy aıasynda elordanyń nóser kárizi júıesi qalaı jańartylatynyn surady.
Vıtse-mınıstr Oljas Saparbekovtiń aıtýynsha, qalada sý basý jaǵdaılary sırek tirkeledi jáne negizinen jaýyn-shashyn kólemi ortasha kórsetkishten áldeqaıda asyp ketken kezde ǵana bolady.
– Biz de osy qalanyń turǵyndary retinde belgili bir deńgeıde qolaısyzdyqty sezinemiz. Alaıda mundaı jaǵdaılar jıi qaıtalanbaıdy. Sırek bolatyn tabıǵı qubylys úshin óte qomaqty qarajat jumsaý bıýdjetke úlken salmaq túsiredi. Sondyqtan onyń qanshalyqty qajet ekeni jan-jaqty baǵalanyp, taldanyp, saraptamadan ótkiziledi, – dedi ol.
Sonymen qatar, Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Nursultan Kerimqulov elimiz boıynsha nóser kárizi júıelerin jańartý ulttyq joba aıasynda qamtylǵanyn aıtty.
– Ulttyq joba aıasynda aıtar bolsaq, nóser kárizi júıesi – sý burý júıesiniń negizgi elementteriniń biri. Sondyqtan nóser kárizderin salý jáne qaıta jańǵyrtý jobalary da ulttyq joba sheńberinde qaralady, – dedi ol.
Mamannyń aıtýynsha, 2026 jylǵa deıin mundaı jobalar respýblıkalyq bıýdjet esebinen qarjylandyrylǵan. Sońǵy on jylda elordadaǵy qatty jaýyn kezinde jıi sý basatyn 11 ýchaskede jumystar júrgizilgen. Olardyń qatarynda Baýyrjan Momyshuly, Máńgilik El dańǵyldary, Pýshkın jáne Abaı kósheleri bar.
Budan bólek, bıyl bul maqsatta Arnaýly memlekettik qordan shamamen 5 mlrd teńge bólingen. Sondaı-aq, jergilikti bıýdjetten jalpy sıpattaǵy transfertter arqyly qosymsha qarjy qarastyrylǵan.
Aıta keteıik, buǵan deıin nóser kezinde Tarlan Astana stantsııasynyń tóbesinen sý aǵyp, CTS onyń sebebin túsindirgen edi.
