Astana kóshelerin sý basty: sý sorý jumystary qalaı júrip jatyr
ASTANA. KAZINFORM — Nóser jaýyp, shahar kóshelerin sý alýyna baılanysty elordanyń kommýnaldyq qyzmetteri kúsheıtilgen rejımde jumys istep jatyr. Bul jóninde Astana qalasy ákimdiginiń baspasóz qyzmeti málimdedi.
— Nóser jaýynǵa baılanysty elordanyń kommýnaldyq qyzmetteri kúsheıtilgen rejımde jumys istep jatyr. Qalanyń nóser káriz júıesi men tazartý qurylystary jaýyn-shashynnyń kóp mólsherin qabyldap, qalypty jumys istep tur. Jekelegen ýchaskelerde ýaqytsha sý jınalý jaǵdaılary tirkelip otyr. Jaýyn-shashyn bir mezette kóp mólsherde jaýǵan kezde nóser káriz júıesi jınalǵan sýdy orta eseppen 40 mınýttan 1 saǵatqa deıingi aralyqta tolyq qabyldaıdy, — delingen ákimdik habarlamasynda.
Sonymen qatar, kommýnaldyq qyzmetter turaqty túrde káriz kollektorlary men jańbyr sýyn qabyldaý qudyqtaryn tazalaý, qubyrlardy býmen shaıý, nóser káriz júıeleri men tazartý qurylystaryn salý jáne basqa da jumystardy úzdiksiz júrgizip keledi.
Aıta keteıik, buǵan deıin elimizdiń birneshe óńirinde nóser men qatty jel bolatynyn jazǵanbyz.
