Astana kóshelerine 2500 túp aǵash otyrǵyzylady
ASTANA. 13 sáýir. QazAqparat - Elordada 20 sáýir kúni ótetin jalpyqalalyq senbilikte 2500 túp túrli aǵash tuqymdaryn otyrǵyzý josparlanýda. Endi qala aýmaǵynda jas úıeńki, emen, qaıyń, qaraǵaı jáne taǵy da basqa aǵashtar paıda bolady. Bul týraly astana.kz saıtyna Astana qalasy ákimi apparatynyń ómir tirshiligin qamtamasyz etý jáne ınfraqurylym bóliminen málim etti.
Bólimniń habarlaýynsha, jalpyqalalyq ekologııalyq senbilik aıasynda «Astana-Kógaldandyrýqurylysy» AQ qalalyq jáne respýblıkalyq uıymdarmen birge aǵashtardyń san túrin qalanyń aýqymdy bóligine otyrǵyzatyn bolady. «Qala aýmaǵyn kógaldandyrý shahardyń ekologııalyq jaǵdaıyn jaqsartýǵa baǵyttalǵan mańyzdy qadam bolyp tabylady. Jasyl jelek elordanyń kelbetin kóriktendirip qana qoımaıdy, onyń mıkroklımatyn da ońaltady. Aýany tazartyp, ylǵaldylyqty arttyrady, dańǵazany tómendetedi», - delingen habarlamada.
Atap aıtqanda, Esil aýdanynda Turan dańǵyly boıyna 1000 dana tal, usaq tamyrly úıeńke, qyzyl órken, bal qaraǵaı tuqymdaryn egý josparlanǵan.
Al Almaty aýdanynda egiletin aǵash odan sál kópteý (1300 dana). Ol kólik aıyrylyǵy kópiri men Pýshkın jáne Aqjol kósheleriniń qıylysyna otyrǵyzylady.
Saryarqa aýdanyna da Tilendıev dańǵyly boıyn 122 pıramıdalyq tal, men qaraǵaı jáne 78 úıeńke - barlyǵy 200 jas aǵash kóriktendiredi.
Eske salaıyq, elorda aýmaǵyn abattandyryp, kógaldandyrý jáne sanıtarlyq tazalaý jónindegi jalpyqalalyq senbilik ekologııalyq aılyq aıasynda 10 sáýirde bastaý aldy. Ekologııalyq aılyq kezinde kógal aýmaǵyn jasyldandyryp, qalalyq saıabaqtar men gúlzarlardy, sondaı-aq, barlyq kóshelerdi retke keltirip, aǵashtardy ákteý josparlanǵan.
