Astana kóshelerindegi jarnamalar, gazet jáne gúl dúńgirshekteri bir úlgige keltiriledi
ASTANA. 10 shilde. QazAqparat - Memleket basshysynyń tapsyrmasyna sáıkes Astanany odan ári damytýǵa baılanysty qalalyq Sáýlet jáne qala qurylysy basqarmasy elorda aýmaǵyndaǵy jarnama men kórnekti aqparattardyń, gazet jáne gúl pavılondarynyń salynýy men ornalasýy erejelerine ózgerister ázirledi.
Keshe ony Astana qalasynyń máslıhat depýtattary biraýyzdan qoldady. Endi jarnama bılbordtar ornastyrylatyn oryndarǵa baılanysty belgili bir kólemde bolady jáne bul gazet pen gúl pavılondaryna da qatysty bolady. Osyǵan oraı, Sáýlet jáne qala qurylysy basqarmasy gazet pen gúl dúńgirshekteriniń birizdendirilgen estetıkalyq úlgisin ázirleýde. Bul týraly astana qalasy ákimdiginiń baspasóz qyzmetinen habarlandy.
«Astana qalasynda jarnamalyq qurylymdardy ornalastyrý máslıhatta bekitilgen mynadaı syzbalardy qatań saqtaı otyryp júzege asyrý usynylady: jarnamalyq-aqparattyq nysandardy jarnamalyq-aqparattyq alańda ornalastyrý syzbasy - aýdandyq mańyzdaǵy magıstraldarda 2-den 5 sharshy metrge deıin; qalalyq mańyzdaǵy magıstraldarda 12-den 18 sharshy metrge deıin;úshinshi syzba - jarnamalyq-aqparattyq alańy 18-den 72 sharshy metrge deıin aqparattyq jarnamalyq nysandar - aınalma joldarda, qalaǵa kirer magıstraldarda», - dedi sessııa barysynda qalalyq Sáýlet jáne qala qurylysy basqarmasynyń jetekshisi Vıtalıı Sıletskıı.
Syrtqy jarnama da bir kórgende kóz tartarlyqtaı ádemi, kósheniń sánine úılesetindeı tartymdy bolyp, saýatty jazylýy qajet. «Jarnama tasyǵyshtar kólemimen nysandardy jaýyp ketpeıtindeı, zaman úlgisi men qala qurylysynyń talaptaryna sáıkes bolýy qajet degen sheshim qabyldadyq. Munymen menshik ıeleri túgelge derlik kelisti.Aldaǵy ýaqytta jańa qurylymdar jasalyp, bul qyzmet retke keltiriledi. Tek jarnama berýshilermen shektelip qana qalmaımyz. Gazet dúńgirshekteri men gúl pavıolondaryn da qalada bir úlgide jónge keltiremiz. Biz qazir álem nazaryn aýdarǵan zamanaýı qala turǵyzýdamyz. Sondyqtan jarnamalar da qazirgi tehnologııalarǵa sáıkes bolýy kerek. Bul baǵytta biz júıeli jumys júrgizip, jańa nysandarda talapqa saı bolýyna kúsh salamyz. Meniń oıymsha, bul óte durys sheshim»- dedi qala ákimi Imanǵalı Tasmaǵambetov.
