Astana kóshelerinde tabıǵı gazdy tutynatyn frantsýz avtobýstary júretin bolady
ASTANA. QazAqparat - Bıyldan bastap astanalyqtar gazben júretin, ári múgedekterdiń de múmkindigi eskerilgen avtobýstardyń qyzmetin paıdalanatyn bolady. Qoǵamdyq kólikter qalaǵa 1-qazanǵa deıin tolyǵymen jetkizilmek, dep habarlaıdy elorda ákimdiginiń resmı saıtynda.
Bul jobany júzege asyrý úshin búgin «Astana LRT»JShS basqarma tóraǵasy Talǵat Ardan men frantsýzdyq «IVECO BUS» kompanııasynyń prezıdenti Per Laýt Astanaǵa 350 IVEKO avtobýsyn jetkizý týraly kelisimshartqa qol qoıdy.
«Avtobýstar Astananyń qysyna yńǵaılanyp jasalǵan. Onyń 270-i 12 metrlik, 80 avtobýs 18 metrlik. Syıymdylyǵy 100-150 adamǵa deıin jetedi. Jalpy, aldaǵy ýaqytta eski avtobýstardy qoldanystan shyǵaryp, jańa 1200 avtobýspen almastyrýdy josparlap otyrmyz», - deıdi «Astana LRT»JShS basqarma tóraǵasy Talǵat Ardan.
Astanada kúnine avtobýstar qyzmetin shamamen 700 myńǵa jýyq adam paıdalanady. Sondyqtan, bul kóliktiń tapshylyǵy da sezilýde - bas qalaǵa 400-ge jýyq avtobýs jetispeıdi.
«Tabıǵı gazben júretin eń zamanýı bul avtobýstarda barlyq jaǵdaı jasalǵan. Kirip-shyǵý óte yńǵaıly. Biz múmkindigi shekteýli jandardyń da jaǵdaıyn eskerdik. Іshine beınekamera ornatylyp, elektrondy, aqparattandyrý quraldarymen jabdyqtalǵan. Sondyqtan el ıgiligi úshin talaı jyl qyzmet etedi dep oılaımyn. Mundaı avtobýstar Frantsııa kóshelerinde júrip júr», - deıdi IVECO BUS kompanııasynyń prezıdenti Per Laýt.
Bul avtobýstardyń kelýimen qyzmet sapasyna qoıylatyn talap ta kúsheıedi. Endi júrgizýshiler biliktiligin arttyrý ortalyǵynda daıyndalsa, kondýktorlardyń ornyn birte-birte elektrondy apparattar almastyrmaq.
Sý jańa qoǵamdyq kólikter jańa kommýnaldy avtobýs parkiniń qaramaǵyna tapsyrylady. Avtopark qurylysyna 8,48 ga jer bólingen.
200 avtobýs bıylǵy jyldyń tamyz aıyna deıin jetkizý josparlansa, qalǵan 150 avtobýs qazan aıynda jetkizilmek. Bul jolaýshylar tasymaly qyzmetiniń sapasyn arttyryp, elordadaǵy ekologııalyq klımatty jaqsartý maqsatynda júzege asyrylyp otyrǵan shara.
