Astana-Qorǵaljyn-Ulytaý avtojoly jóndeledi — Roman Sklıar
ASTANA. KAZINFORM — Astana-Qorǵaljyn-Ulytaý avtomobıl jolyn jóndeý kezeń-kezeńmen iske asyrylady. Bul týraly Májilis depýtattarynyń saýalyna Premer-mınıstrdiń birinshi orynbasary Roman Sklıardyń jaýabynda aıtylǵan.
— «Ortalyq-Batys» jobasyn iske asyrý maqsatynda tehnıkalyq-ekonomıkalyq negizdemeni ázirleý kezinde tıimdi marshrýtty anyqtaý úshin jumys toby quryldy. Jumys toby «Astana — Arqalyq-Torǵaı-Yrǵyz» jáne «Astana-Ulytaý-Sekseýil» baǵyttaryn zerdeledi. Nátıjesinde «Astana-Arqalyq-Torǵaı-Yrǵyz» baǵyty boıynsha qurylys jumystaryn júrgizý týraly sheshim qabyldandy. Qazirgi ýaqytta bekitilgen marshrýt boıynsha merdiger anyqtalyp, qarjylandyrý máselesi pysyqtalyp jatyr. Daıyndyq jumystary júrgizilýde. Іske asyrý merzimi — 2026-2028 jyldar, — dedi birinshi vıtse-premer.
Onyń aıtýynsha, Aqmola, Qaraǵandy jáne Ulytaý oblystarynyń aýmaǵynan ótetin «Astana-Qorǵaljyn-Ulytaý» avtomobıl joly aldaǵy ýaqytta jóndeledi.
— Jergilikti halyqtyń ótinishin eskere otyryp, osy baǵytta jóndeý jumystaryn júrgizý josparlanǵan. Osyǵan baılanysty Kólik mınıstrligi jergilikti atqarýshy organdarmen birlesip, atalǵan avtomobıl joly boıynsha jóndeý jumystarynyń josparyn ázirlep jatyr. Qazirgi ýaqytta is-sharalar jospary men qarjylandyrý kózderi boıynsha jumystar pysyqtalýda, — dedi ol.
Úkimet basshysy birinshi orynbasarynyń dereginshe, aldaǵy úsh jylda mol qarajatty talap etetin 3 myń shaqyrymnan astam jobalardy iske asyrý josparlanyp otyr. Olardyń qatarynda «Qyzylorda-Qaraǵandy-Jezqazǵan», «Ortalyq-Batys», «Qyzylorda-Aqtóbe», «Jańaózen-Kendirli», «Saryaǵash qalasynyń aınalma joly» jáne «Atyraý-Dossor» jobalary bar.
— Joǵaryda aıtylǵandardy eskere otyryp, qarjylandyrý múmkindigine qaraı «Astana-Qorǵaljyn-Ulytaý» ýchaskesin jóndeý jumystary kezeń-kezeńimen iske asyrylady. Atalǵan másele Úkimet pen jergilikti atqarýshy organdardyń turaqty baqylaýynda, — dedi Roman Sklıar.
Buǵan deıin Májilis depýtaty Asylbek Nuralın Premer-mınıstrdiń birinshi orynbasary Roman Sklıarǵa saýal joldap, Astana-Qorǵaljyn-Ulytaý jolyn salýdy usynǵan edi.