Astana kórermeni Jaıymovtardyń shyǵarmashylyq keshin tamashalady
ASTANA. QazAqparat - Kongress holl saraıynda ótken Aıtqalı Jaıymov pen onyń uly Arman Jaıymnyń shyǵarmashylyq keshinde kórermenderdi daryndy óner ıeleriniń kúrdeli mýzykalyq týyndylary tánti etti.
Tereń sezimge boılaıtyn, birneshe bólimnen turatyn shyǵarmalardy tyńdaǵan jurtshylyq has ónerdi joǵary baǵalap, shynaıy qoshemet kórsetti, dep habarlaıdy QazAqparat.
Aıtalyq, Ǵazıza Jubanova atyndaǵy memlekettik ishekti aspaptar kvarteti Arman Jaıymnyń kvartetke arnalǵan tórt bólimdi № 1 kontsertin oryndady.
Sondaı-aq kórermen nazaryna qos kompozıtor birlesip jazǵan «Bıbarys» operasynan da úzindi usynyldy. Osy oraıda, Qazaqstannyń eńbek sińirgen qaıratkeri Azamat Jyltyrkózovtiń oryndaýyndaǵy Bıbarystyń arııasy sátti shyqty.
Al Qazaqstannyń eńbek sińirgen qaıratkeri Bıbigúl Januzaq «Bıbarys» operasynan Aıdananyń arııasyn naqyshyna keltire shyrqady.
Halyqaralyq konkýrstardyń laýreaty Shahrızada Tynyshtyq «Tóle bı» kontatasynan «Qarlyǵashtyń ánin» oryndap berdi.
Qobyzshy Botagóz Táshimova orkestrdiń súıemeldeýimen Arman Jaıymnyń qobyzǵa arnalǵan kontsertin usyndy.
Aıtqalı Jaıymov qazaqtyń qońyr dombyrasyn qolyna alyp, óziniń el Táýelsizdigine arnaǵan «Erkin el», «Ómir-ózen» jáne Dına Nurpeıisovaǵa arnaǵan «Kúı-Ana» kúılerin oryndaǵanda, kórermender uzaq qol soǵyp, qoshemet bildirdi.
Osy keshte A. Jaıymovtyń keıbir shyǵarmalaryna oraı «Shalqyma» halyq bı ansambli de óner kórsetti.
«Bul bizdiń el Táýelsizdiginiń 25 jyldyǵyna arnaǵan kontsertimiz. Sondyqtan da «Shattyq Eli» dep ataldy. Ulym Arman ekeýmizdiń jazǵan kóptegen mýzykalyq shyǵarmalarymyz bar. Solardyń birqataryn kórermender nazaryna usynýdy jón kórgen edik. Bári de oıymyzdan shyqty dep oılaımyn. Kontsertke kelip, Qazaq halyq aspaptary orkestrine jáne ózge de óner kórsetken azamattarǵa qoshemet bildirgen kórermenderge úlken rızashylyǵymyzdy bildiremiz»,- dedi QazAqparat tilshisine arnaıy suhbat bergen Astana qalasy ákimdiginiń memlekettik akademııalyq fılarmonııasynyń Qazaq halyq aspaptary orkestriniń kórkemdik jetekshisi ári bas dırıjeri, QR eńbek sińirgen qaıratkeri, professor Aıtqalı Jaıymov.
Kontsert barysynda fılarmonııanyń Qazaq halyq aspaptary orkestri de jan-jaqty qalyptasqan óner ujymy ekenin aıqyn baıqatty. Nebir kúrdeli kúılerdi de, mýzykalyq týyndylardy da asqan sheberlikpen jetkize bildi.
