Astana kontsert pen jahandyq is-sharalardan qalaı tabys tabady
ASTANA. KAZINFORM – Astana Ortalyq Azııanyń mádenı jáne týrıstik ortalyǵy mártebesin senimdi túrde nyǵaıtyp keledi, dep habarlaıdy Astana qalasynyń Investıtsııalar jáne kásipkerlikti damytý basqarmasynyń sarapshylary.
Sheneýnikter mynadaı faktilerdi keltirip otyr. Erteń, 21 qyrkúıekte elordada jyldyń eń úlken shoýlarynyń biri – aty ańyzǵa aınalǵan Backstreet Boys tobynyń kontserti ótedi, oǵan 45 elden 12 myńnan astam qonaq keledi. Kontserttiń jalpy kórermeni 30 myńnan asady.
Astananyń Investıtsııalar jáne kásipkerlikti damytý basqarmasynyń málimeti boıynsha, 2025 jyldyń birinshi jartyjyldyǵynda ǵana Astanaǵa shamamen 750 myń týrıst kelgen, bul ótken jylmen salystyrǵanda 9%-ǵa artqan. Onyń 180 myńy sheteldik qonaqtar boldy. Kelýshiler sany boıynsha birinshi orynda Reseı, Qytaı, Túrkııa, AQSh jáne Germanııa boldy.
Bıyldyń ózinde elordada ondaǵan aýqymdy sharalar ótti. Comic Con Astana 2025 rekordtyq 70 000 qatysýshyny, onyń ishinde 36 elden 10 myń qonaqty tartty. Ekonomıkalyq áser 3,5 mıllıard teńgeden asty. Djennıfer Lopestiń kontsertine 30 myńnan astam kórermen jınaldy, olardyń úshten biri sheteldikter boldy. Buryn habarlanǵandaı, Qazaqstanda álemge áıgili juldyzdardyń kontsertterin uıymdastyratyn kompanııalar toby 2025 jyldyń sońyna deıin bıýdjetke 1 mıllıard teńgeden astam salyq tóleıtin boldy.
– Elorda mádenıet, sport, medıtsına jáne ınnovatsııalar toǵysatyn alańǵa aınalyp keledi. Biz týrıster tarapynan da, halyqaralyq seriktester tarapynan da qyzyǵýshylyqtyń artyp kele jatqanyn baıqap otyrmyz, - dep atap ótti «Astana» týrızmdi damytý ortalyǵynyń basqarma tóraǵasy Artem Kvashýk.
Onyń aıtýynsha, IFLA Dúnıejúzilik kitaphana kongresi, Astana halyqaralyq forýmy, halyqaralyq medıtsınalyq jáne ǵylymı kongresterdi qosa alǵanda, 200-den astam iri is-shara josparlanǵan. Bir ǵana IFLA Astanada 114 elden 1 600-den astam delegattyń basyn qosty.
– 2024 jyly elordalyq klınıkalarda JCI halyqaralyq standarttaryna sáıkes keletin 4 500-ge jýyq halyqaralyq patsıentke bilikti kómek kórsetildi. Onkologııa, kardıohırýrgııa, reprodýktıvti medıtsına jáne check-up baǵdarlamalary úlken suranysqa ıe, - dedi A.Kvashýk.
Іs-shara týrızmimen qatar medıtsınalyq týrızm de qarqyndy damyp keledi.
– Mádenı sharalar men halyqaralyq kontsertter Astana úshin jaı ǵana shoý emes, olar qalanyń týrızmi men ekonomıkalyq tartymdylyǵyn arttyryp jatyr, - deıdi «Astana týrızmdi damytý ortalyǵy» AQ basqarma tóraǵasy.
Almaty qonaqúıleri týrısterden 50 mıllıard teńgeden astam tabys tapqany buǵan deıin habarlanǵan bolatyn.