«Astana» Konferentsııa lıgasynyń úshinshi irikteý kezeńine shyqty

ASTANA. KAZINFORM - UEFA Konferentsııa lıgasy ekinshi irikteý kezeńinde búgin qazaqstandyq «Astana» syrt alańda Moldovanyń «Zımbrý» komandasyn jeńip, jarysty jalǵastyrýǵa múmkindik aldy.

Alǵashqy kezdesýde komandalar 1:1 esebine qanaǵat bildirgen edi. Sondyqtan búgingi oıynda jeńiske jetken komanda jarysty jalǵastyrýǵa múmkindik alatyn. 

Qazaqstandyq komanda alǵashqy mınýttan shabýylǵa kóbirek kóńil bóldi. Nátıjesinde olardyń qatarynan Djeffrı Chınedý 18-mınýtta esep ashsa, Ýsman Kamara 21-mınýtta basymdyqty arttyrdy.

Ekinshi kezeńde moldovalyq klýb tarazy basyn teńestirýge umtyldy. Degenmen dittigen maqsatyna jete almaı jatty. 

Osylaısha «Astana» syrt alańda qarsylasynan 2:0 esebimen basym túsip, úshinshi irikteý kezeńine shyqty.

Endi elordalyq komanda «Vardar» (Soltústik Makedonııa) jáne «Lozanna» (Shveıtsarııa) jubynyń jeńimpazymen sheberlik baıqasady.

Bul oıyndar 7 jáne 14 tamyz kúnderi ótkiziledi. 

Dál qazir «Aqtóbe» ekinshi irikteý kezeńinde syrt alańda Chehııanyń «Sparta» komandasymen qarymta kezdesýi óktizip jatyr. Alǵashqy oıynda qazaqstandyq komanda atalǵan qarsylasynan 2:1 esebimen basym túsken edi.

Eske salsaq, almatylyq «Qaırat» fýtbol komandasy UEFA Chempıondar lıgasy ekinshi irikteý kezeńinde Fınlıandııanyń KýPS komandasyn jeńip, jarystyń úshinshi kezeńine joldama aldy.