«Astana» Konferentsııa lıgasynyń toptyq kezeńine shyqty

ASTANA. KAZINFORM - Búgin fýtboldan UEFA Konferentsııa lıgasynyń pleı-off kezeńinde qazaqstandyq «Astana» Norvegııanyń «Brann» komandasymen qarymta oıyn ótkizdi. 

Alǵashqy oıynda qarsylasyna 0:2 esebimen ese jibergen astanalyq klýb alǵashqy mınýttan tizgindi óz qolyna alýǵa tyrysty. Dese de, birinshi kezeńde tablodaǵy esepke ózgeris engen joq.

Ekinshi kezeńde de oıyn jaǵdaıy dál osyndaı qarqynda órbidi. Elordalyq komanda jıi shabýyl uıymdastyrsa, oǵan norvegııalyq fýtbolshylar laıyqty tótep bere bildi. Oıynnyń 61-mınýtynda astanalyq komandadan Djeffrı Chınedý áýelete berilgen pasty qaqpaǵa darytty.

Ol 81-mınýtta taǵy bir márte mergendik tanytty.

Al 91-mınýtta jasyl alańǵa shyqqan Ramazan Kárimov arada mınýt ótpesten norvegııalyq qorǵaýshylardyń óreskel qateligin sheber paıdalanyp ketti.

Osylaısha elordalyq klýb qarsylasynan 3:0 esebimen basym túsip, Konferentsııa lıgasy toptyq kezeńine joldama aldy.

«Astana» týrnırdi ekinshi irikteý kezeńinen bastap, alǵashqy aınalymda Moldovanyń «Mılsamı» klýbyn (1:0, 1:1) qapy qaldyrsa, odan keıin Rýmynııanyń «Korvınýl» komandasynan (2:1, 6:1) basym tústi.

Aıta ketsek, elordalyq komanda 2015/16 jylǵy maýsymda Chempıondar lıgasy, odan keıin úsh jyl qatarynan Eýropa lıgasy, byltyr Konferentsııa lıgasy toptyq kezeńinde synǵa tústi.

Aıta ketsek, búgin 29 tamyzda 21:00-de Chempıondar lıgasy toptyq kezeńiniń jerebesi tartylady. Saltanatty shara «Qazsport» telearnasynan tikeleı efırde kórsetiledi.