«Astana» komandasynyń shabandozy Saýd Arabııasyndaǵy kópkúndikte ekinshi oryn aldy

ASTANA. KAZINFORM – XDS Astana Team komandasynyń shabandozy Serhıo Igıta Saýd Arabııasynda ótken «AlÝla Týr» kópkúndik jarysynyń jalpy esep qorytyndysy boıynsha ekinshi orynǵa kóterildi, dep habarlaıdy Kazinform agenttigi.

Saýd Arabııasynda ótken kópkúndik jarystyń uzyndyǵy 163,9 shaqyrymdy quraǵan sheshýshi besinshi kezeńi Harrat-Ývaırıd bıiktigine kóterilýmen aıaqtaldy. Dál osy synda jalpy eseptiń qorytyndysy belgili boldy. Qashyqtyq barysynda Igıta jappaı qulaýǵa tap bolǵanymen, jarysty jalǵastyryp, sońǵy jaǵynda belsendi kúres júrgizdi jáne qarsylastarynan úzilip kórýge talpyndy. Nátıjesinde ol kezeńdi altynshy bolyp aıaqtap, jalpy esepte ekinshi oryn ıelendi.

– Ókinishke qaraı, kezeńniń ortasynda qulaý boldy, ol aıtarlyqtaı aýyr tıdi. Soǵan qaramastan, ornymyzdan turyp, sońyna deıin kúrestik. Komanda maǵan orasan qoldaý kórsetti. Barlyq jigitter kómektesti, al Malýchellıdiń keshe jeńiske jetýi bizge zor motıvatsııa berdi. Nátıjesinde jalpy esepte ekinshi oryn aldyq, bul kórsetkishpen maqtana alamyz. Osy jarysta atqarǵan jumysy úshin búkil komandaǵa alǵys aıtamyn, – dedi Serhıo Igıta máreden keıin.

Jarysta qazaqstandyq shabandoz Nıkolıa Vınokýrov ta joǵary nátıje kórsetip, jalpy esepte jetinshi orynǵa turaqtady. Onyń aıtýynsha, bul kópkúndik jarys komanda úshin sátti ótti.

– Óz ónerime rızamyn. Bes kúnniń ishinde úsh ret úzdik ondyqqa kirip, jalpy esepte jetinshi oryn aldym, bul men úshin mańyzdy nátıje. Ekvadorda qysqy daıyndyq óte jaqsy ótti, sonyń arqasynda aıtarlyqtaı alǵa jyljydym. Endi basty maqsatym – bir aptadan keıin ótetin Azııa chempıonaty. Qazir babym jaqsy, jeńis úshin kúresemin, – dedi Nıkolıa Vınokýrov.

Buǵan deıin XDS Astana Team komandasy halyqaralyq eń joǵary deńgeıdegi jarystarǵa qatysýǵa múmkindik beretin WorldTour lıtsenzııasyn alǵan bolatyn.