«Astana» komandasynyń shabandozy Oman týryn jeńip aldy

ASTANA. KAZINFORM – Qazaqstandyq XDS Astana Team komandasynyń ıtalııalyq veloshabandozy Krıstıan Skaronı Oman týrynyń jeńimpazy atandy, dep habarlaıdy Kazinform.

Nızva – Djabal ál-Ahdar (Green Mountain) baǵyty boıynsha ótken 155,9 shaqyrymdyq besinshi kezeń Skaronı úshin sátti boldy. Ol qashyqtyqty 3:23:19 ýaqyt kórsetkishimen baǵyndyrdy.

Onyń komandalasy, ıspanııalyq Krıstıan Rodrıges Martın ekinshi bolyp márege jetti. Úshinshi oryndy Team Jayco Alula sapyndaǵy avstralııalyq Lýkas Plapp ıelendi.

Osy nátıjesiniń arqasynda Skaronı jalpy esepte birinshi oryn aldy. Al Rodrıges Martın ekinshi orynǵa ıe bolyp, «Astana» komandasyna qorytyndy esepte qos júlde ákeldi.

Aıta keteıik, keshe «Astana» shabandozy Oman týrynyń jalpy esebinde ekinshi orynǵa kóterilgeni habarlanǵan bolatyn.