«Astana» komandasynyń shabandozy Haınan jarysynda jeńiske jetti
ASTANA. KAZINFORM — Qytaıdyń Sanıa qalasynda ótken kópkúndik «Haınan týry» velojarysynyń jalpy esebinde XDS Astana Team komandasynyń shabandozy Tomas Sılva jeńimpaz atandy.
Baotın — Sanıa baǵyty boıynsha ótken 154,6 shaqyrymdyq sońǵy kezeń jappaı sprıntpen aıaqtaldy. Bul kezeńde Li Ning Star komandasynyń ókili Aleksandr Salbı jeńiske jetse, ekinshi oryndy Dýshan Raıovıch (Solution Tech NIPPO Rali), úshinshi oryndy Norman Vahtra (China Anta – Mentech Cycling Team) ıelendi.
Tomas Sılva fınaldyq kezeńde júldegerler qataryna kirmegenine qaramastan, jalpy esepte kóshbasshylyqty saqtap, «Haınan týry-2026» jarysynyń jeńimpazy atandy. Ol bir kún buryn kezeńde jeńiske jetip, jalpy esepte kóshbasshylyqty óz qolyna alǵan edi.
— Bul jetistikke óte qýanyshtymyn. Biz jarysty joǵary deńgeıde ótkizdik, komanda bir apta boıy uıymshyldyqpen jumys istedi. Bul men úshin mańyzdy jeńis, — dedi Sılva komanda baspasóz qyzmetine.
Komandanyń tehnıkalyq menedjeri Dmıtrıı Sedýn jarystyń qıyndyqtaryna aldyn ala daıyn bolǵandaryn atap ótti.
— Biz bul jarysty jaqsy bilemiz, sondyqtan qandaı qıyndyqtar kútip turǵanyn aldyn ala boljadyq jáne soǵan daıyn boldyq. Jeńis úshin kúrese alatyn jáne komandaǵa tıimdi kómektesetin shabandozdardan barynsha ońtaıly quram jasaqtaýǵa tyrystyq. Árıne, aptap ystyq barlyǵyna áser etti, alǵashqy kúnder ońaı bolǵan joq, biraq biz ony eńserdik. Negizgi kezeńderge muqııat daıyndalyp, nátıjesinde kózdegen maqsatymyzǵa jettik. Bul jarys pen ondaǵy jeńis komanda úshin de, demeýshimiz úshin de mańyzdy boldy, sondyqtan jeńistiń bizge buıyrǵanyna qýanyshtymyz. Alaıda maýsym jalǵasýda, alda áli de mańyzdy jarystar kóp, sondyqtan jaqsy kóńil-kúımen Eýropaǵa oralyp jatyrmyz, — dedi ol.
Taǵy bir shabandoz Nıkolıa Vınokýrov jarysty altynshy orynmen aıaqtap, úzdik azııalyq veloshabandozǵa beriletin kók jeıdeni jeńip aldy.
Aıta keteıik, Tomas Sılva bul jarysta buǵan deıin de eki kezeńde top jarǵan bolatyn.
