«Astana» komandasy «Atyraýdy» jeńip, kósh basyna shyqty

ASTANA. KAZINFORM - Elordalyq «Astana» Qazaqstan Premer-lıgasy komandalary arasyndaǵy el birinshiliginiń keıinge qaldyrylǵan 17-týrynda «Atyraýdy» jeńip, birinshi orynǵa kóterildi.

Elordalyq klýb bıyl el birinshiliginde bas júldege qol sozýdy aldyna maqsat etip otyr. Qazir árbir kezdesýde úsh upaı oljalap, jınaqy oınaýǵa kúsh salyp keledi. Sońǵy toǵyz kezdesýdiń nebári bireýinde teń túsip, qalǵanynda jeńiske jetti.

Búgingi matchta da sol sáttilik serııasyn jalǵastyrýǵa tyrysty. Degenmen oıyn barysynda alǵashqy goldy atyraýlyq komanda soǵyp ketti. Ony 25-mınýtta Igor Stasevıch óziniń enshisine jazdy. Birinshi kezeńde «Astananyń» esepti teńestirýge múmkindigi bolǵan joq.

Ekinshi taımda elordalyq komanda belsendilik tanytty. Nátıjesinde olardyń qatarynan Branımır Kalaıtsıa 67-mınýtta mergendik tanytsa, Nazmı Grıpshı 85-mınýtta penaltıden múlt ketken joq. Al 97-mınýtta atyraýlyq komandadan Oljas Kerimjanov tarazy basyn teńestirse, 102-mınýtta Branımır Kalaıtsıa 11 metrlik aıyp soqqysyn sátti oryndap, «Astanany» alǵa shyǵardy. 

Osylaısha elordalyq klýb qarsylasynan 3:2 esebimen basym túsip, týrnır kestesinde birinshi orynǵa kóterildi. Enshisinde 22 oıynnan keıin 43 upaı bar. Ekinshi oryndaǵy «Qaıratta» 41 upaı bar.

Bas júlde taǵdyryn aldaǵy oıyndar sheshedi. Endi «Astana» óz alańynda 10 qarashada «Jetisýdy» qabyldasa, 3 qarashada syrt alańda «Tobylmen» oınaıdy. Al «Qaırat» 2 qarashada óz alańynda «Ordabasymen» sheberlik baıqassa, 10 qarashada syrt alańda «Atyraýmen» kezdesedi.