Astana kolledjiniń stýdentinen 2 keliden astam esirtki tabyldy

ASTANA. QazAqparat – Astanada kolledj stýdentiniń turǵylyqty jerinen 2 keliden astam gashısh esirtkisi tabyldy, dep habarlaıdy QazAqparat polisia.kz-ke silteme jasap.

«Qalalyq Polıtsııa departamenti Esirtki qylmysyna qarsy is-qımyl basqarmasynyń qyzmetkerleri jedel-izdestirý is-sharalaryn ótkizý kezinde esirtki satýshyny ustady.

Manas kóshesindegi turǵyn úıde elorda kolledjiniń 3-kýrs stýdentin ustaldy. Páterde 18 jastaǵy stýdentten salmaǵy eki keliden asatyn gashısh tárkilendi. Sondaı-aq tintý kezinde elektrondy tarazy, ólshep-oraý ydystary jáne esirtki quraldaryn ólshep-oraýǵa arnalǵan qurylǵylar tabylyp, tárkilendi.

Esirtkini asa iri mólsherde saqtaý faktisi QR Qylmystyq kodeksiniń 296-baby 4-bóligi boıynsha sotqa deıingi tergep-tekserýdiń biryńǵaı tizilimine tirkeldi. Qazirgi ýaqytta elordaǵa esirtkini jetkizý arnasy anyqtalyp jatyr», - delingen polıtsııa habarlamasynda.

Málim etilgendeı, astanada bıylǵy jyl basynan zańsyz aınalymnan 250 keliden astam túrli esirtki zaty tárkilendi. Onyń ishinde 120 keli – gashısh jáne 30 keli sıntetıkalyq esirtki bar.