Astana kolledjderine qujat qabyldaý bastaldy: bıyl 10 myńnan asa grant bólindi
ASTANA.KAZINFORM — Astana qalasynyń kolledjderine talapkerlerden qujat qabyldaý naýqany bastaldy. Elordada qazirgi tańda 32 kolledj jumys isteıdi. Onyń ishinde 9 memlekettik jáne 23 jekemenshik oqý orny bar.
2026-2027 oqý jylyna kolledjderge qujat qabyldaý ár mamandyqtyń ereksheligine qaraı ár túrli ýaqytta júrgiziledi.
25 maýsym — 27 tamyz aralyǵy:
* jumysshy mamandyqtary boıynsha;
25 maýsym — 22 tamyz aralyǵy:
* orta býyn mamandyqtary men qoldanbaly bakalavrıat baǵdarlamalaryna, negizgi jáne jalpy orta bilim negizinde memlekettik bilim berý tapsyrysy boıynsha kúndizgi oqý nysanyna;
25 maýsym — 20 shilde aralyǵy:
* shyǵarmashylyq daıyndyqty qajet etetin mamandyqtarǵa;
25 maýsym — 10 tamyz aralyǵy:
* tehnıkalyq jáne kásiptik, orta bilimnen keıingi bilim negizindegi pedagogıkalyq mamandyqtarǵa;
25 maýsym — 10 tamyz aralyǵy:
* negizgi orta bilim negizindegi medıtsınalyq mamandyqtarǵa;
25 maýsym — 15 tamyz aralyǵy:
* jalpy orta, tehnıkalyq jáne kásiptik, orta bilimnen keıingi bilim negizindegi medıtsınalyq mamandyqtarǵa;
25 maýsym — 27 tamyz aralyǵy:
* aqyly negizde kúndizgi oqý nysanyna;
25 maýsym — 20 qyrkúıek aralyǵy:
* keshki jáne syrttaı oqý nysandaryna.
Aıta keteıik, kolledjder qujattardy onlaın eGov portaly arqyly qabyldaıdy.
Kolledjge túsý úshin talapkerler mynadaı qujattardy usynýy qajet:
* oqýǵa qabyldaý týraly ótinish;
* bilim týraly qujat;
* 3×4 kólemindegi tsıfrlyq fotosýret;
* № 075/ý úlgisindegi medıtsınalyq anyqtama;
* jeńildik qarastyrylǵan sanattarǵa jatatyn talapkerler úshin mártebesin rastaıtyn qujattar.
Jeke kýálikti usyný talap etilmeıdi. Qajetti málimetter memlekettik aqparattyq júıelerden avtomatty túrde alynady.
Aıta keteıik, 2026-2027 oqý jylyna arnalǵan memlekettik bilim berý tapsyrysy aıasynda Astana qalasynyń kolledjderine jalpy sany 10 300 granttyq oryn bólindi.
Jumysshy biliktilikteri boıynsha 15 kolledjge 3 224 oryn bólindi. Onyń 6-aýy — memlekettik, 9-y — jekemenshik. 9-synyp bazasynda — 2 969 oryn, 11-synyp bazasynda — 255 oryn qarastyrylǵan.
Maqsatty memlekettik tapsyrys aıasynda 6 kolledjge 376 oryn bólindi. Bul baǵyt boıynsha 47 kásiporyn bekitilip, dýaldy oqytý men jumysqa ornalastyrý tetikteri qarastyrylǵan.
Inklıýzıvti bilim berý boıynsha 5 kolledjde 93 oryn bólindi. Atap aıtqanda:
* Qurylys-tehnıkalyq kolledji;
* Qoǵamdyq tamaqtandyrý kolledji;
* Servıs jáne týrızm kolledji;
* Shveıtsarııalyq-amerıkandyq kolledji;
* URBAN COLLEGE.
Orta býyn mamandary men qoldanbaly bakalavrıat baǵdarlamalaryna 6 607 grant bólindi.
Memlekettik bilim berý tapsyrysynyń ulǵaıýy tehnıkalyq jáne kásiptik bilim alýǵa nıetti jastar úshin jańa múmkindikter ashyp otyr. Bıylǵy qabyldaý naýqanynda talapkerler eńbek naryǵynda suranysqa ıe mamandyqtar boıynsha tegin bilim alyp, bolashaq mamandyǵyn ıgerýge múmkindik alady.
Aıta ketelik bıyl kolledjge qujat qabyldaý qashan bastalatyny týraly jazǵan edik.
