Astana kolledjderinde aǵylshyn tilinde bilim berilmek
ASTANA. QazAqparat - Aldaǵy oqý jylynda elordanyń keıbir kolledjderinde bilim berý aǵylshyn tilinde júrgiziletin bolady. Mamandyqtar tizimine qonaq úı sharýashylyǵy menedjerleri, daıashylar men barmender, sondaı-aq medıtsınalyq qyzmetkerler engizildi, dep habarlaıdy astana.kz.
Elbasynyń «100 naqty qadam» josparynda qazaqstandyq túlekterdiń básekege qabilettiligin arttyrýǵa zor kóńil bólingen. Biliktiligi joǵary kadrlardy daıyndaý protsesine basymdyq beriledi, sol arqyly kolledjder kezeń-kezeńmen aǵylshyn tilinde oqytýǵa kóshedi. Astana qalasy Bilim basqarmasy basshysynyń mindetin atqarýshy Qasymhan Senǵazyev qalalyq máslıhattyń turaqty komıssııasynyń otyrysynda málim etkendeı, tájirıbelik joba aıasynda 2015-2016 oqý jylynda Astananyń 4 kolledjinde stýdentter aǵylshyn tilinde bilim alatyn bolady. Sebebi elordada qurylatyn jańa qarjy ortalyǵy men EXPO-2017 halyqaralyq kórmesin ótkizý halyqaralyq deńgeıge sáıkes daıyndalǵan kadrlardyń bolýyn talap etedi.
