Astana kóktemgi sý tasqynyna qarsy jumystar júrgizýde
ASTANA. 15 aqpan. QazAqparat - 2013 jyldyń qańtar aıynda elordada jaýǵan qar aılyq mólsherden anaǵurlym artyp, 226 paıyzdy qurady.
Aqpan aıynyń alǵashqy onkúndiginde túsken qar da belgilengen mólsherden anaǵurlym kóp, dep habarlaıdy astana.kz saıty qala ákimdigi apparatynyń ómir tirshiligin qamtamasyz etý jáne ınfraqurylymdy damytý bólimine silteme jasap.
Sınoptıkterdiń málimeti boıynsha, bıylǵy qardyń ylǵaldylyǵy kóp jylǵy tájirıbeden 2-3 ese joǵary ekendigi baıqalady. Eger aýa raıy kúrt jylynyp ketse, qar óte tez erıdi. Osyǵan baılanysty qazir sý tasqynynyń aldyn alý is-sharalary qarqyndy uıymdastyrylýda.
Arnaıy jasalǵan josparǵa sáıkes, 2013 jyldyń 15 naýryzyna deıin Esil basseın ınspektsııasy qar sýy quıylyp, tolǵan kezde erkin aǵýy úshin JEO-2 jáne Indýstrıaldyq park aýmaǵynda Esil, Aqbulaq, Sarybulaq ózenderiniń arnalaryna salynǵan (barlyǵy toǵyzǵa jýyq nysan) ótkelder men tosqaýyldardy, dambylardy joıýdy josparlaýda. Qazir sý nysandaryn tekserýden ótkizý jumystary jalǵasýda.
Sonymen qatar, sý tasqyny buzyp ketýi múmkin osal tustardy bekitý maqsatynda «Astana Tazalyq» JShS merdigerlik mekemesi kúshimen jańbyr sýlary aǵatyn kárizder, sý júretin arnalar qar men muzdan tazartylýda.
Al osy aptada elordanyń Almaty, Saryarqa, Esil aýdandary aýmaǵynan 150 myń tekshe metrden astam qar tazalanyp shyǵarylsa, onyń tek 28 tekshe metri «Shubar» turǵyn úı alqaby aýmaǵynan tasylǵan. «Han Shatyr», «Saryarqa», «Kerýen» saýda, oıyn-saýyq ortalyqtary men taǵy da basqa adamdar kóp júretin jerlerdiń sanıtarlyq jaǵdaıy únemi baqylaýǵa alynǵan.
