«Astana» klýbynyń kapıtany qyzyl jeıde úshin talasqa túspek
ASTANA. QazAqparat - Ispanııada bastalǵan «Výelta» velojarysynyń bas júldesine qazaqstandyq «Astana ProTeam» komandasy da úmitti, dep jazady Habar arnasy.
Áıgili kópkúndik saıys sheshýshi 20-shy kezeńge jetti. Buǵan deıingi kórsetkishter boıynsha astanalyq shabandoz Fabıo Arý jarys kóshbasshysy gollandııalyq Toma Dıýmolınadan 6 sekýndqa keshigip keldi. «Astana» klýbynyń kapıtany búgin qyzyl jeıde úshin talasqa túspek. Osyǵan baılanysty veloujym ókilderi jarysqa deıingi daıyndyqtaryn kúsheıtken. Máselen, komandanyń bas aspazshysy arnaıy taǵam ázirledi. Sportshylardyń búgingi tańǵy asyna mıýslı, omlet, et jáne spagettı pastasy berildi.
«Taıaýda ótken kezeń sportshylar úshin óte qıyn boldy. Olardyń keshki asyna qyzyl et pen makaron usyndyq. Bul taǵamdar shabandozdarǵa qosymsha kúsh beredi. Eger kezeń jeńil ótkende balyq berýge de bolatyn. Al búgin túrli taǵamdar ázirledik. Qalaǵan tamaǵyn jeýine bolady», - deıdi «AstanaProTeam» komandasynyń bas aspazshysy Danıele Zanerı.
