«Astana» klýbynan ketkenim ókinishti bolar edi - Stanımır Stoılov
ASTANA. QazAqparat - "Astana" FK bas bapkeri Stanımır Stoılov reseılik "Lokokmotıv" komandasyna aýysý týraly qaýesetti joqqa shyǵardy.
"Mundaıdy eshqashan aıtqan emespin. Jaýap bireý ǵana - meniń komandam bar. Ol - "Astana". Men tek "Astanaǵa" bar kúsh-jigerimdi salýdamyn. Eki jylda biz keremet jetistikterge jettik jáne klýbtan ketip jatsam, óte ókinishti bolar edi. Mende jazda klýbtan ketetin múmkindik boldy. Biraq men kóp oılanyp, "Astanada" qalýdy sheshtim. Bizdiń klýb áli de damıdy. Men "Astanaǵa" kerek bolsam, ońaılyqpen ketpeımin", - dedi bolgarııalyq maman Astanada ótken baspasóz máslıxatynda.
Aıta keteıik, erteń, 18 tamyzda Eýropa lıgasynyń pleı-off synynda "Astana" FK "BATE" komandasymen kezdesý ótkizedi.
