Astana klýby týraly ne bilemiz
ASTANA. QazAqparat - Jaqynda elimizde Eýrazııa damýynyń ózekti máselelerin talqylaýǵa arnalǵan Astana klýbynyń ekinshi otyrysy ótti. Búgingi tańda osyndaı dıalogtyń qajettiligi tek óńirlerde emes, sonymen qatar búkil álem elderiniń múddesin qozǵaý maqsatynda týyndaýda.
Astana klýbyna elýden astam elderdiń, onyń ishinde AQSh, Reseı, Eýropalyq Odaq, Qytaı, Túrkııa, Iran jáne taǵy basqa memleketterdiń ekonomıka, saıasat, halyqaralyq qatynas salalarynyń saqa sarapshylary, qoǵam qaıratkerleri qatysty.
Klýbtyń sessııasynda tórtkúl dúnıeniń tórt buryshynan kelgen joǵary dárejeli burynǵy memleket qyzmetkerleri, bilikti ǵalymdar - jetekshi ǵylymı-zertteý uıymdarynyń basshylary bas qosty.
Bul sarapshylar ekonomıka men saıasattaǵy álemdik betalystardan habardar jáne olar ony ary qaraı damytýǵa óz úlesterin qosýda. Álemdik saıası birlestikterdiń ózderi mańyzdy sheshim qabyldaıtyn kezde osy sarapshylarmen keńesip otyrady.
Eýrazııa búginde búkil álemniń yqylasyn ózine aýdarýda. Qytaı, Reseı, AQSh sekildi damyǵan iri memleketter, Eýroodaqqa múshe elderdiń múddeleri osynda toǵysýda. Sondyqtan, barlyq qatysýshylardyń seniminen shyǵyp, múddeli taraptardyń arasyndaǵy osyndaı dıalogtar táýelsiz alańda ótýi qajet. Al, Qazaqstan kópqyrly saıasatty ustanyp, barlyq memlekettermen birqalypty qarym-qatynas ornatqandyqtan, atalmysh alańǵa aınaldy.
Óńirler aldyndaǵy mańyzdy máselelerdiń biri - zııatkerlik máselesi. Eýrazııanyń qaqtyǵystar men shıelenisterdiń emes, yntymaqtastyq pen múmkindikterdiń alańyna aınalýy úshin iri oıynshylardyń óńir aldynda turǵan keleli máselelerdi birlesip sheshýi qajet. Mine, osy sebepti atalmysh máselelerdi tek resmı kelissózder úlgisinde emes, ashyq pikir almasý túrinde talqylaǵan tıimdi.
Klýbtyń sessııasy Chatham House erejesi boıynsha ótýde, ıaǵnı atalmysh otyrystaǵy ıdeıalardy avtorlyǵyn jarııalamaı qoldanýǵa bolady. Bul sarapshylardyń eń ózekti álemdik problemalardy ashyq túrde talqylaýyna jol ashady. Osyndaı qaǵıdany ustanyp, jumys jasaıtyn dıskýssııa alańy dúnıejúzinde kóp emes. Bul árıne, Astana klýbynyń taǵy bir artyqshylyǵy.
