Astana klýby ózin úlken jetistik retinde kórsete aldy - Davıd Chıkvaıdze
ASTANA. QazAqparat - Astana klýby ózin úlken jetistik retinde kórsete aldy. Bul týraly Astana klýbynyń úshinshi otyrysynyń qorytyndysy boıynsha baspasóz máslıhatynda BUU Jeneva bóliminiń bas dırektory apparatynyń jetekshisi Davıd Chıkvaıdze málim etti, dep habarlaıdy QazAqparat.
«Meniń oıymsha, Astana klýbynyń bolashaǵy zor. Bul rette ol is júzinde atqarylatyn ózekti sharalardy maqsatty túrde izdestirýge qaýqarly alań jáne osy alańda álem elderiniń kóptegen basshylary pikir almasyp, birlesken sheshimderdi jasaı alar edi. Sondyqtan Astana klýby qazirdiń ózinde qyzyqty alań, alaıda onyń aýqymy keńeıe túsetinine senimim mol. Biz Qazaqstan elordasynda túrli kózqarastardy tyńdap, óte qyzyqty ári mańyzdy pikirlerge kýáger boldyq. Osy oraıda búginde túrli taraptar arasyndaǵy ózara senimsizdiktiń negizin, sondaı-aq keńinen talqylaýdy qajet etetin ózekti máselelerdi aıqyndaı aldyq», - dedi Davıd Chıkvaıdze Ortalyq kommýnıkatsııalar qyzmetinde baspasóz máslıhatynda.
Bul turǵyda ol Qazaqstannyń halyqaralyq arenada júzege asyryp jatqan bastamalary úshin QR Prezıdentine alǵysyn aıtty.
«Atap aıtsaq, Astana klýby ózin úlken jetistik retinde kórsete aldy, sondyqtan onyń áleýeti de joǵary»,-dep túıindedi sózin Davıd Chıkvaıdze.
Budan buryn habarlanǵandaı , 13 qarashada elordada Qazaqstan Prezıdenti Nursultan Nazarbaevtyń qatysýymen Astana klýbynyń úshinshi otyrysy ótti.
Osy halyqaralyq pikirtalas alańy álemniń 28 elinen 60-tan astam kórnekti saıası qaıratkerlerdi, dıplomattardy, tanymal saıasattanýshylardy, bedeldi ǵalymdardy jınady. Klýbtyń jumysyna joǵary dárejeli saıasatkerler - burynǵy memleket basshylary Abdýlla Gúl (Túrkııa), Vatslav Klaýs (Chehııa), Danılo Tıýrk (Slovenııa) qatysty.
