«Astana» klýby óz jetistikteri arqyly elorda men Qazaqstannyń atyn álemge áıgileýi kerek - N. Nazarbaev
ASTANA. 4 shilde. QazAqparat - «Astana» klýby óz jetistikteri arqyly elorda men Qazaqstannyń atyn álemge áıgili ete túsýi kerek. Búgin elordada «Astana» prezıdenttik kásibı sport klýbynyń saltanatty tusaý keseri barysynda sóz sóılegen Memleket basshysy, atalmysh klýbtyń qurmetti Prezıdenti Nursultan Nazarbaev osylaı málimdedi.
Elbasy óz sózinde «Astana» prezıdenttik kásibı sport klýby qatarynda álemdik arenada dańqy shyqqan ataqty sportshylardy toptastyra alǵanyn aıtyp, onyń músheligine ǵalamat nátıjeler kórsetken atletter engenin jetkizdi. «Bir kezderi Gegel aıtpaqshy, «kúshtiler birikse, onda olardy eshkim jeńe almaıdy». Sondyqtan da, men bizdiń sportshylarymyzdyń naǵyz jeńimpaz bolǵanyn tileımin. Aldyńǵy qatarly tehnologııalar, sporttyq menedjment bizdiń osy baǵyttaǵy áleýetimizdi eselep, múmkindik shekarasyn onan saıyn keńeıte túspek», - dedi N. Nazarbaev.
Sonymen qatar, Elbasy jańa klýbtyń ataýyna toqtala kele, bunyń zor mindetter júkteıtinin de atap ótti. «Endigide klýb óz jetistikteri arqyly elordanyń atyn álemge áıgilep, sol arqyly bútkil Qazaqstan jahanǵa tanylýy tıis. Jalpy, biz ınvestorlardan osy klýbqa barynsha qoldaý bolýlaryn suraımyz», - degen Nursultan Ábishuly barsha sportshylar men jankúıerlerdi búgingi mereıli kúnimen quttyqtady. «Bizdiń komandamyzdyń aty álemge áıgili bolady dep senemin. Qýanysh qutty bolsyn», - dedi N. Nazarbaev.
