Astana klýby otyrysynda qandaı máseleler talqylanady

NUR-SULTAN. QazAqparat – Elordada ótip jatqan Astana klýbynyń 6-otyrysy kúntártibindegi basty másele pandemııa saldaryn joıýǵa qatysty bolady. Bul jaıynda Álemdik ekonomıka jáne saıasat ınstıtýtynyń sarapshysy Jumabek Sarabekov aıtty, dep habarlaıdy QazAqparat tilshisi.

«Kúntártibindegi basty másele – pandemııa. Jalpy álem halqyn alańdatyp otyrǵan da osy másele ekeni belgili. Osy «pandemııadan qalaı shyǵamyz?», «ekonomıkamyzdy qalpyna keltirý protsesi qalaı júredi?» degen máseleler talqyǵa túspek. Pandemııadan keıin jańa álemge aıaq basqaly otyrmyz. Al sol álem qandaı bolmaq, erejeleri qandaı bolmaq? 6-shy otyrystyń aıasynda Qazaqstan Táýelsizdiginiń 30 jyldyǵyna arnalǵan sessııa uıymdastyrylady. Sessııa barysynda elimizdiń 30 jylda júrip ótken jolyna qorytyndy jasap, «aldaǵy ýaqytta Qazaqstandy qandaı qaýip-qaterler kútip tur?» «qandaı múmkindikterimiz bar?», «qaı baǵytta qozǵalýymyz kerek?» degen máselelerdi talqylaımyz», - dedi otyrys aıasynda BAQ ókilderine bergen suhbatynda.

Onyń atap ótýinshe, Astana klýby aıasynda álemniń úzdik sarapshylary, memleket qaıratkerleri elordaǵa jınalyp, kópshilikti tolǵandyrǵan ózekti suraqtarǵa jaýap beredi.

«Otyrys 3 kúnge jalǵasady. Osy úsh kúnniń ishinde aldymyzda turǵan jahandyq máselelerdi sheshe almaıtyndyǵymyz túsinikti. Biraq, ózimizge qajetti suraqtardy sarapshylarǵa qoıyp, soǵan jaýap alamyz. Jalpy, alqaly jıynǵa álemniń 20 elinen 30-ǵa jýyq spıker oflaın formatta qatysyp jatyr. Munan bólek biraz spıkerimiz onlaın rejımde qatysady. Jalpy 55 spıker bolady», - dedi Jumabek Sarabekov.

Buǵan deıin elordada Astana klýbynyń 6-otyrysy jumysyn bastaǵanyn habarlaǵan edik.