«Astana» klýby qataryna fýtbolshy qyzdardy tartýda
ASTANA. QazAqparat - 2019 jyldan bastap «Astana» fýtbol ortalyǵynda qyzdar toby jasaqtalýda, dep habarlaıdy QazAqparat «Astana» FK saıtyna silteme jasap.
«Qyzdardan top jasaqtaý Qazaqstan fýtbol federatsııasynyń «Alǵa, Qazaqstan! Alǵa, fýtbol!» damý strategııasy jobasy aıasynda júzege asyp otyr. 2019 jyldan bastap sertıfıkattaý erejesine sáıkes otandyq klýbtardyń fýtbol ortalyqtarynda qyzdar toby qurylatyn bolady. Bul sheshim elimizdegi áıelder fýtbolyn damytý jáne keńinen nasıhattaý aıasynda engizildi», - delingen habarlamada.
Dál qazirgi ýaqytta topta 2006-2007 jyly týǵan qyzdar daıyndalýda. Komandany kásibı túrde fýtbolmen aınalysqan, óz kezeginde Qazaqstan jastar quramasyna shaqyrtý alǵan tájirıbeli maman Mahabbat Dosjanova jattyqtyrýda.
Elorda fýtbol ortalyǵynda daıyndalǵysy keletin qyzdardyń qatary kún saıyn artyp, jańa sportshylar iriktelýde. Bolashaqta olar respýblıkalyq jarystarda «Astana» komandasynyń namysyn qorǵaıtyn bolady.
