Astana qytaılyq týrıster úshin jańa baǵytqa aınalmaq
ASTANA. KAZINFORM — Qytaı Halyq Respýblıkasynyń Úrimji qalasynda VII halyqaralyq týrıstik kórme – Xinjiang Spring Tourism Expo 2026 ótti. Bul týraly Astana qalasynyń ákimdigi jazdy.
Aýqymdy sharaǵa «Bir beldeý — bir jol» bastamasyna qatysýshy elderden, sondaı-aq álemniń ózge de aımaqtarynan 600-den astam týrıstik uıym jınaldy. Kórmege «Astana Tourism» týrızmdi damytý ortalyǵy da qatysty.
Xinjiang Spring Tourism Expo 2026 týrızm salasyndaǵy halyqaralyq baılanysty nyǵaıtýdyń mańyzdy alańyna aınaldy. Kórme týrıstik agenttikterdi, qonaq úılerdi jáne belsendi demalysqa arnalǵan taýar óndirýshilerdi qosa alǵanda, sala mamandaryn jınap, qatysýshylarǵa tıimdi usynystar men jeńildikter usyndy.
— Kórme aıasynda Shyńjań-Uıǵyr avtonomııalyq aýdanynyń týroperatorlary jáne óńirlik týrızm basqarmasynyń ókilderimen kelissózder júrgizildi. Kezdesýler nátıjesinde Qytaıdan Qazaqstanǵa týrıstik toptardy uıymdastyrý jóninde kelisimderge qol jetkizildi, — delingen habarlamada.
Jalpy sany 40-tan astam iskerlik baılanys ornatylyp, aldaǵy yntymaqtastyqqa jańa múmkindikter ashyldy.
«Astana Tourism» tanystyrylymynda oqıǵalyq týrızmdi damytý men Qazaqstan astanasyna baǵyttalǵan týrıstik marshrýttardy ilgeriletýge erekshe nazar aýdaryldy. Kólik qoljetimdiligi, atap aıtqanda tikeleı áýe reısteriniń bolýy jáne qalalar arasyndaǵy damyǵan logıstıka qytaılyq seriktesterdiń qyzyǵýshylyǵyn týdyrǵan negizgi faktorlardyń biri boldy.
Sonymen qatar, qoldanystaǵy 30 kúndik vızasyz rejım men «Bir beldeý — bir jol» bastamasynyń tabysty júzege asyrylýy QHR azamattarynyń Astana men Qazaqstannyń týrıstik áleýetine degen qyzyǵýshylyǵyn aıtarlyqtaı arttyryp otyr.
Eske sala keteıik, buǵan deıin Memleket basshysy týrızm salasyndaǵy negizgi úsh aımaqty aıqyndap bergen edi. Qazir memlekettiń búkil saıasaty osy baǵyttardyń tóńireginde qalyptasyp otyr. Árqaısysyna arnap keshendi damý jospary ázirlengen. Onda Almaty taý klasteri, Şýchınsk-Býrabaı kýrorttyq aımaǵy jáne Mańǵystaý týrıstik aımaǵy — Qazaqstan týrızminiń úsh tirek núktesi retinde atalǵan.
