«Astana» kıevtik «Dınamo» fýtbolshysymen tolyǵýy múmkin
ASTANA. QazAqparat - Kıevtik «Dınamo» men Belarýs quramasynyń jartylaı qorǵaýshysy Nıkıta Korzýn taıaýda ǵana ýkraındik jattyqtyrýshy Roman Grıgorchýk basshylyq etken elordalyq «Astanaǵa» aýysýy múmkin, dep habarlaıdy QazAqparat sports.kz-ke silteme jasap.
Budan buryn «Dınamo» prezıdenti Igor Sýrkıs Korzýnnyń taıaýda satylatyn nemese jalǵa beriletinder tiziminde ekendigin aıtqan bolatyn. Ótken maýsymda Korzýn «Dınamonyń» negizgi quramynda 10 match ótkizgen. Belarýs fýtbolshysy bul komandaǵa 2016 jyly mınskilik «Dınamodan» 750 myń eýroǵa aýysyp, qosylǵan.
Eske salaıyq, taıaýda Grıgorchýktiń basshylyǵymen «Astanaǵa» 26 jastaǵy qorǵaýshy Marat Bystrov kelgen edi. Búgin 20:30-da elordalyq komanda Almatyda «Qaıratqa» qarsy Qazaqstan premer-lıgasynyń mańyzdy matchyn ótkizedi.
