Astana keshteri: «Ýolton hanymnyń baǵy» Qazaqstanda tuńǵysh ret qoıylady
«Bul festıvaldiń ereksheligi - túrli janrlardy biriktire alýynda. Bıyl da festıvalge kelgen tanymal juldyzdar álemdik premeralarymen qýantady. Máselen, Roberto Molınellı jazǵan «Ýolton hanymnyń baǵy» kontserti Qazaqstanda alǵash ret qoıylady. Ledı Ýolton - kompozıtor Ýılıam Ýoltonnyń áıeli, ol Italııanyń ońtústiginde ǵajap baq ósirgen. Bul kontserttiń árbir bólimi belgili bir gúlge, aǵashqa nemese ósimdikke arnalady. Ledı Ýolton Argentınanyń týmasy bolǵandyqtan, kontserttiń sońǵy bólimi Argentınadan Italııaǵa ákelingen «Palo Býracho» aǵashyna arnalady jáne tango stılinde oryndalady. Tangony oryndap turyp, bılemeý múmkin emes. Sondyqtan, kontsertti Almaty baletiniń solısi Nelson Penıa ekeýmiz tango bıimen aıaqtaımyz», - dedi ataqty ıtalııalyq altıst Anna Serova QR Mádenıet jáne sport mınıstrliginde ótken baspasóz máslıhatynda.
Sonymen birge, uıymdastyrýshylardyń aıtýynsha, elimizde tuńǵysh ret ıtalııalyq kompozıtor Salvatore Freganyń «Magic Horse» orkestrlik pesasy qoıylady. Kompozıtor bul týyndyny «Astana keshteri» festıvaline tartý etken. Týyndyny «Solıster akademııasy» memlekettik orkestri oryndaıdy. Bul týyndy Los-Andjelestegi Asademia Music Awards-2019 júldesin ıelengen.
Aıta keteıik, 3-7 maýsym kúnderi elordada dástúrli Astana keshteri» VIII halyqaralyq óner festıvali ótip jatyr. Jyl saıyn festıvalge klassıka, halyq óneri, estrada baǵytyndaǵy mýzykanyń úzdik úlgilerin oryndaıtyn belgili óner maıtalmandary qatysady.
Festıvaldiń basty maqsaty - halyqtyń túrli áleýmettik toptaryna álemdik ónerdiń jaýharlaryn tamashalaýǵa múmkindik berý. Sondyqtan ónerdiń ozyq úlgileriniń barsha halyqqa qoljetimdiligin qamtamasyz etý maqsatynda bul jobanyń kontsertterine barlyq bıletter tegin taratylady.
Festıvaldiń erekshe qonaqtary - múmkindigi shekteýli jandar. Uıymdastyrýshylar olardyń kontsertke kelýi úshin arnaıy kólikpen qamtamasyz etedi. Elorda turǵyndary men qonaqtary barlyq kontsertterge bıletterdi «Qazaqstan» ortalyq kontsert zaly kassasynan tegin ala alady.
