Astana keshteri: Mýzykanttar 4 birdeı fortepıanomen óner kórsetedi
NUR-SULTAN. QazAqparat - 7 maýsym kúni «Astana keshteri» VIII halyqaralyq óner festıvaliniń jabylý saltanatynda qazaqstandyq jáne ıtalııalyq mýzykanttar 4 birdeı fortepıanomen óner kórsetedi, dep habarlaıdy QazAqparat tilshisi.
«4 roıal & alt» kontsertinde alǵash ret A.Vıvaldı men I.S.Bahtyń 4 roıalǵa arnalǵan týyndysy oryndalmaq.
Shyǵarmany qazaqstandyq jáne ıtalıandyq vırtýozdar - Marko Skıavo men Serdjo Markedjanı jáne Tımýr Ormanshıev pen Arman Tileýbergenov oryndaıdy.
«Bul týyndy Qazaqstanda alǵash ret oryndalǵaly tur. Onyń ústine 4 fortepıanoda qatar oınalady. Keshe qazaqstandyq mýzykanttarmen daıyndyq jasap kórdik, eń aldymen boı úırenisý kerek boldy. Sebebi árqaısysy - óz isiniń sheberi, árkimniń óz pikiri bar. Biraq, sońynda mýzyka jeńip shyqty, shyǵarmany oıdaǵydaı oryndaı aldyq. 7 maýsym kúni de tabysty óner kórsetemiz degen oıdamyz», - dedi Marko Skıavo QR Mádenıet jáne sport mınıstrliginde ótken baspasóz máslıhatynda.
Aıta keteıik, 3-7 maýsym kúnderi elordada dástúrli «Astana keshteri» VIII halyqaralyq óner festıvali ótip jatyr. Festıvaldiń basty maqsaty - halyqtyń túrli áleýmettik toptaryna álemdik ónerdiń jaýharlaryn tamashalaýǵa múmkindik berý.
Sondyqtan ónerdiń ozyq úlgileriniń barsha halyqqa qoljetimdiligin qamtamasyz etý maqsatynda bul jobanyń kontsertteriniń bıletteri tegin taratylady. Elorda turǵyndary men qonaqtary barlyq kontsertterge bıletterdi «Qazaqstan» ortalyq kontsert zaly kassasynan tegin ala alady.
Festıvaldiń erekshe qonaqtary - múmkindigi shekteýli jandar. Uıymdastyrýshylar olarǵa kontsertterge kelýi úshin arnaıy kólikpen qamtamasyz etedi.
Eske salaıyq, Astana keshteri» VIII halyqaralyq óner festıvaliniń jabylý saltanatynda «Lady Walton's Garden», «Magic Horse» syndy birqatar álemdik týyndylar tanystyrylady.
