«Astana keshteri»: 5 qaıyrymdylyq kontserti uıymdastyrylady
NUR-SULTAN. QazAqparat - Jýyrda elorda tórinde shymyldyǵyn ashatyn VIII halyqaralyq «Astana keshteri» festıvali aıasynda ótetin barlyq kontsertterge áleýmettik osal top ókilderi tegin kiredi jáne aıtýly keshtiń basty qonaqtary múmkindigi shekteýli jandar bolady. Bul týraly «Qazaqkontsert» memlekettik kontsertter uıymynyń dırektory Jeńis Seıdýllauly OKQ-de ótken baspasóz máslıhatynda málim etti, dep habarlaıdy QazAqparat tilshisi.
«Bıylǵy festıvaldiń baǵdarlamasy mazmuny jaǵynan san alýan. Elordalyq kórermender óziniń mýzykalyq talǵamyna saı operalyq, kameralyq, sımfonııalyq, organdyq jáne aspaptyq kontsertterdi tamashalaı alady. Sondaı-aq, festıval aıasynda az qamtylǵan jáne kóp balaly otbasylarǵa arnalǵan 5 qaıyrymdylyq kontsert tegin uıymdastyrylady. Onyń bıletterin «Qazaqstan» ortalyq kontsert zalynyń kassasynan alýǵa bolady. Halyqty múmkindiginshe tolyq qamtý maqsatynda 8,5 myń bılet ázirlendi. Osy turǵyda «Astana keshteri» barsha ónersúıer qaýymǵa úlken meıram, qýanysh syılaıdy degen úmittemiz», - dedi J. Seıdýllauly.
Odan bólek, «Qazaqkontsert» basshysy óner keshiniń basty qonaqtary týraly sóz qozǵady.
«Bul mádenı sharasy álemde teńdesi joq dep aıtýǵa bolady. Bizdiń festıval tek qana túrli salalyq kontsertterimen ǵana emes, jyl saıyn jańashyldyǵymen de erekshelenedi. Mysaly, bıylǵy óner keshiniń basty qonaqtary - múmkindigi shekteýli jandar bolmaq. Ol úshin barlyq jaǵdaı men múmkindik jasalatyn bolady», - dedi ol.
Aıta ketsek, buǵan deıin 3-7 maýsym kúnderi elordada «Astana keshteri» atty halyqaralyq óner festıvaliniń ótetindigi týraly habarlaǵan bolatynbyz.
