Astana Qazaqstan halqynyń birligi kúnin keńinen atap ótedi
ASTANA. Mamyrdyń 1-i. QazAqparat /Damır Baımanov/ - Astanada Qazaqstan halqynyń birligi kúnine arnalǵan merekelik sharalar saǵat 11.00-de bastalady.
Qalalyq ákimdiktiń aldynda ulttyq-mádenı ortalyqtar, kórkemónerpazdar ujymdary daıyndaǵan úlken kontserttik baǵdarlama bastalady. Halyq serýeni qalanyń basqa da aýdandarynda: Báıterek janyndaǵy alań men Otan qorǵaýshy monýmentiniń janynda, elordalyq saıabaq pen Qarjy mınıstrligi ǵımaratynyń aldynda ótedi. Otan qorǵaýshy monýmentiniń janynda Memlekettik fılarmonııa ártisteriniń, «Jastar» saraıy ujymdarynyń, mektep oqýshylarynyń qatysýymen kontserttik baǵdarlama bolady. Osy jerde sondaı-aq, qolkúres, kir tasyn kóterý, arqan tartý, aýdaryspaq sııaqty sport túrlerinen jarystar ótedi, Karate ortalyǵynyń ókilderi óner kórsetedi. Uıymdastyrýshylardyń aıtýynsha, sondaı-aq qoldanbaly óner týyndylarynyń kórmesi uıymdastyrylady. Saǵat 14.00-te osy alańda «MuzArt» jáne «Nadır-shah» toptary óner kórsetedi.
Qazaqstan halqynyń birligi kúni - Memlekettik meıram. Qazaqstan Respýblıkasynyń Prezıdenti N.Á.Nazarbaevtyń Jarlyǵyna sáıkes 1996 jyldan bastap atap ótiledi. 140-tan astam ult ókilderi turatyn Qazaqstan úshin bul mereke dástúrli meıramdardyń birine aınaldy.
