Astana qaıyrymdylyq keshiniń jeńimpazdary anyqtaldy
ASTANA. QazAqparat - Elordanyń 20 jyldyǵyna oraı uıymdastyrylǵan grand baldyń hanshaıymy men hanzadasy belgili boldy, dep habarlaıdy QazAqparat tilshisi.
Astana qaıyrymdylyq grand balyna 75 jup qatysyp, 5 túrli bı bıledi. Odan bólek, balǵa elimizdiń túkpir-túkpirinen arnaıy shaqyrylǵan qonaqtar qatysty.
Qaırymdylyq keshiniń hanshaıymy 18 jastaǵy almatylyq Azıza Zeınolla atansa, hanzada tıtýlyn 21 jasar ShQO-nyń týmasy Oralǵazy Tańatqanov ıelendi. Qos jeńimpazǵa Túrkııa eline saıahatqa bılet tartý etildi.
«Qanshama qatysýshynyń ishinen jeńimpaz atanamyn dep oılaǵan joqpyn jáne bul keshke ol maqsatpen qatysqan emespin. Meniń maqsatym - izgi nıetpen qaıyrymdylyq jasap, múmkindiginshe májbúr jandarǵa qol ushyn sozý. Ózim turmysy tómen otbasydan shyqqandyqtan qaıyrymdy kisilerdiń jaqsylyǵyn kórip óskenmin. Sondyqtan shyn júrekten jasalǵan qaıyrymdy is adamnyń ózine qaıtyp keletinine senimdimin», - dedi qaırymdylyq keshiniń hanzadasy Oralǵazy Tańatqanov.
Qaırymdylyq keshiniń hanshaıymy men hanzadasynan bólek, belsendi qatysýshylarǵa «Jomart júrek», «Qaıyrymdy júrek», «Qaıyrymdy debıýtant», «Erekshe qosqan úlesi úshin», «Belsendiligi úshin», «Erligi úshin», «Ómirge degen qushtarlyǵy úshin», «Qaısarlyǵy úshin» atty arnaıy nomınatsııalar tabys etildi.
Qaıyrymdylyq keshine elimizdiń belgili estrada juldyzdary, atap aıtqanda Maıra Muhamedqyzy, Nurlan Kermenbaev, Gúlnur Orazymbetova, Tamara Asar, Ámire, aǵaıyndy Júginisovter qatysyp óz ónerlerin ortaǵa saldy.
Sonymen qatar, aıtýly shara aıasynda aýktsıon uıymdastyrylyp, oǵan qylqalam sheberleriniń kartınalary men túrli baǵaly zattar qoıyldy.
Uıymdastyrýshylardyń aıtýynsha, aýktsıonnan túsken barlyq qarjy Astanadaǵy qarttar men balalar úılerine jáne turmysy tómen otbasylarǵa jumsalady.
Aıta ketsek, buǵan deıin Astanada atalǵan qaıyrymdylyq keshiniń alǵash ret ótip jatqanyn habarlaǵan bolatynbyz.
