«Astana» «Qaırattan» jeńilip, chempıon bolý múmkindigin qıyndatyp aldy
ASTANA. QazAqparat – Búgin fýtboldan premer-lıga komandalary arasyndaǵy el birinshiliginiń 21-týrynda elordalyq «Astana» Almatynyń «Qaıratynan» jeńilip qaldy. Saldarynan chempıon bolý múmkindigi qıyndaı tústi, dep habarlaıdy QazAqparat tilshisi.
Bıyl elordalyq komanda sátsiz oıyn kórsetip keledi. Qazir týrnır kestesinde úshinshi orynda tur. Bas júldeniń aýyly alystaı túsken sekildi. Qazir birinshi orynda kele jatqan Shymkenttiń «Ordabasy» klýby olardan on upaıǵa ozyp ketti. Alda nebári bes týr ǵana qaldy. Qalǵan oıyndarda «Astananyń» jeńiske jetý múmkindigi qandaı?
Búgingi kezdesýde elordalyq komandanyń bas bapkeri Grıgorıı Babaıan aralas quramda oıynshylardy jasyl alańǵa shyǵardy. Aldaǵy beısenbide olar Albanııada jergilikti «Partızanı» komandasymen Konferentsııa lıgasy pleı-off satysynda qarymta oıyn ótkizedi. Bıyl aldyna eýrokýbok oıyndarynda toptyq kezeńge shyǵý úshin mindetin qoıǵan olar endi bar kúshin sol kezdesýge salatyny anyq.
«Qaıratpen» kezdesý barysynda Makı Banıak soqqan jalǵyz gol saldarynan «Astana» jeńilip qaldy. Saldarynan «Ordabasyny» upaı sany jóninen uzatyp aldy.
Taǵy eki kezdesýde «Atyraý» men «Aqtóbe» 0:0 esebine qanaǵat bildirse, «Qyzyljar» «Aqsýdan» 1:0 esebimen basym tústi.
Dál qazir «Tobyl» men «Ordabasy» kezdesýi ótip jatyr. Ázirge esep - 0:0.
Sondaı-aq, 26 tamyzda «Oqjetpes» pen «Kaspıı» 3:3, «Qaısar» men «Jetisý» 1:1 esebimen teń tússe, «Maqtaaral» «Shahterdi» 3:1 esebimen súrindirdi.
