Astana kásipkerlerine AITV/JITS jáne týberkýlez jaıynda lektsııa oqyldy
ASTANA. QazAqparat - Búgin Astanada AITV/JITS jáne týberkýlezdiń aldyn alý mekemeleriniń mamandary qaladaǵy shaǵyn jáne orta bıznes ókilderimen kezdesý ótkizdi.
Astana qalasynyń JITS ortalyǵynyń mamandary «Medıtsınalyq qyzmetkerlerge quqyqtyq kómek» Respýblıkalyq qoǵamdyq uıymymen jáne Astana qalalyq týberkýlezge qarsy kúres dıspanserimen birlesip, QR Densaýlyq saqtaý mınıstrliginiń áleýmettik jobasy aıasynda «Atameken» óńirlik kásipkerler palatasynda bıznes ókilderine arnap semınar uıymdastyrdy.
Іs-sharanyń basty maqsaty bıznes qurylym basshylarynyń Dúnıejúzilik ekonomıkalyq forýmnyń Jahandyq básekege qabilettilik ındeksi, sonyń ishinde «AITV/JITS pen týberkýlezdiń bızneske yqpaly» kórsetkishi jóninde habardarlyǵyn arttyrý.
Uıymdastyrýshylardyń aıtýynsha, qazirgi tańda elimizdiń básekege qabilettiligi ult densaýlyǵymen tikeleı baılanysty.
Astana qalasy JITS-ke qarsy kúres ortalyǵynyń AITV juqpasyna epıdemıologııalyq qadaǵalaý bóliminiń meńgerýshisi Іnjý Aımaǵambetova AITV-ınfektsııasynyń álemdegi, elimizdegi jáne Astana qalasyndaǵy epıdemıologııalyq ahýalymen tanystyrdy. Sonymen qatar, atalmysh juqpanyń bızneske áseri jáne DEF JBQI elimizdegi reıtıngi jóninde aıtty. «Qazirgi tańda AITV-ınfektsııasyn juqtyrýshylardyń 42 paıyzy turaqty jumysy bar, belgili qyzmet atqaratyn, turmys jaǵdaıy jaqsy adamdar. Sol sebepti jumys berýshi retinde atalmysh juqpanyń taralýy men juǵý joldary jáne ony juqtyrǵan naýqastardyń qoǵamdaǵy quqyǵy jaıynda kóbirek bilgenderińiz jón dep oılaımyz», - dedi ol.
Іnjý Beketqyzynyń bergen málimetine súıensek, qala boıynsha AITV-ǵa shaldyqqandardyń 70 paıyzy ony jynystyq jolmen juqtyrǵan jáne olardyń deni 18-40 jas shamasyndaǵylar.
Barlyq qatysýshylarǵa aqparatttyq bilim berý materıaldary jáne «AITV-ınfektsııasy joq Qazaqstan» jadynamalary taratylyp, saýalnama júrgizildi.
