Astana kásipkerleri aýlasyn las ustaǵany úshin 9 mln. teńge aıyppul tóleıdi - (FOTO, VIDEO)
ASTANA. QazAqparat - Qalany tazalaý jáne abattandyrý qalalyq qyzmetterdiń kún tártibindegi basty máselelerdiń biri bolyp tabylady. Bul rette túrli uıymdardyń, mekemeler men ShOB ókilderiniń qala aýmaǵyn abattandyrý erejelerin buzý jaǵdaılaryn anyqtaýǵa jáne boldyrmaýǵa baǵyttalǵan profılaktıkalyq is-sharalardy ótkizý de asa mańyzdy. Astana qalasynyń tabıǵat qorǵaý polıtseıleri tıisti jumystardy turaqty túrde qolǵa alady.
Búgin astanalyq polıtseıler aýmaqty abattandyrý erejelerin saqtamaıtyn kásipkerlerdi anyqtaý boıynsha reıd ótkizdi. Kún saıyn bekitilgen aýmaqtardy aralaý barysynda polıtseıler qurylystardyń irgeles aýmaqtaryn sanıtarlyq ustaý men ýaqytyly jınaýdy uıymdastyrýdy baqylaıdy. Búgin tekserý barysynda tártip saqshylary kásipkerlerdiń, kólik jýý oryndarynyń, dúkenderdiń, sondaı-aq qurylys obektileriniń ıeleriniń irgeles aýmaqtardy qalaı ustaıtynyn baǵalady.
Astana qalalyq máslıhatynyń 2004 jylǵy 30 naýryzdaǵy №28/6-III «Abattandyrý, sanıtarlyq jabdyqtaý, jınaý jumystaryn uıymdastyrý jáne Astana qalasynyń aýmaǵynda tazalyqty qamtamasyz etý qaǵıdalary týraly» sheshimine sáıkes kásipkerler irgeles aýmaqty (perımetri 5 m) taza ustaýǵa mindetti, sondaı-aq qala turǵyndary úshin tártip saqtaý boıynsha qolaıly jaǵdaı jasaýy kerek.
Ústimizdegi jyldyń birinshi toqsanynda tabıǵat qorǵaý polıtsııasynyń qyzmetkerleri 723 tekserý júrgizip, nátıjesinde shaǵyn jáne orta bıznes obektisiniń 372 ókili ákimshilik jaýapkershilikke tartyldy. Jalpy, 9 mln. teńge kóleminde aıyppul salynǵan.
«Kólik jýý ornyna irgeles aýmaq las. Jınalmaıtyn kezderi de bolady. Iesiniń ózi joq. Oǵan qyzmetkeri arqyly saǵat 17.00 bólimge kelsin dep shaqyrý qaǵazyn qaldyryp kettik. Mekeme ıesine qatysty ákimshilik jaza qoldanylady», - deıdi Astana qalasynyń ІІD JPQ aǵa ınspektory Oraz Ahmetov.
Aıta keteıik, barlyq basshylarmen jáne azamattarmen abattandyrý erejelerin saqtaý, sanıtarlyq ustaý, nysan aýmaǵyn jınaýdy uıymdastyrý jáne tazalyqty qamtamasyz etý týraly profılaktıkalyq áńgimelesýler júrgiziledi. QR Ákimshilik quqyq buzýshylyq týraly kodeksi boıynsha abattandyrý erejelerin buzǵany úshin zańdy tulǵalarǵa 30-100 AEK mólsherinde aıyppul salý qarastyrylǵan, dep habarlaıdy qalalyq ákimdiktiń baspasóz qyzmeti.
