«Astana» qarjy ortalyǵynda kimder jumys isteıdi
ASTANA. QazAqparat - «Astana» HQO basqarýshysy Qaırat Kelimbetov shtatta jumys istep júrgen qyzmetkerler týraly aıtyp berdi, dep xabarlaıdy QazAqparat tilshisi.
«Qazirgi kezde bizdiń shtat 100 adamnan aspaıdy. Olardyń 90 protsenti - Qazaqstan azamattary. Ashyǵyn aıtaıyn, kóbisi - jastar, bári «Bolashaq» jáne taǵy basqa granttyq baǵdarlamalar boıynsha álemniń jetekshi oqý oryndarynda bilim alǵan. Qarjy ortalyǵynyń barlyq qyzmetkerleri, kem degende, aǵylshyn tilinde sóıleıdi. Basym bóligi birneshe tilde sóıleı alady. Al xalyqaralyq qatynastar departamentiniń mamandary taǵy qytaı tilin de biledi», - dedi Q.Kelimbetov Úkimet úıinde ótken baspasóz máslıxatynda.
Onyń aıtýynsha, aldaǵy ýaqytta shtatty keńeıtý sharalary qarastyrylmaǵan.
«Bizde kásibı biliktilikti úzdiksiz shyńdaý bıýrosy degen qurylym bar. Sonyń aıasynda biz batyl bir josparymyzdy iske asyrýdy kózdeımiz. Búginde Úndistan men Reseı baǵdarlama jasaýshylardyń qyzmeti jaǵynan oq boıy ozyq elderdiń qataryna kiredi. Olardyń mamandary aýstsorsıngpen jumys jasaıdy. Ondaıda baǵdarlama jasaýshylar úıden shyqpaı-aq, ózge memleketterge qyzmet kórsetip jatady. Biz úsh-bes jyldyń ishinde 5 000 myń qazaqstandyq mamandy qaıta daıarlaýdan ótkizip, týra sondaı aýsorsıng ortalyǵyn qurýdy kózdeımiz», - dep atap kórsetti Q.Kelimbetov.
Aıta keteıik, búgingi baspasóz máslıxatynda Q.Kelimbetov krıptovalıýtaǵa qatysty keńes berdi.
