«Astana» qarjy ortalyǵy jasyl ekonomıkany damytpaq
ASTANA. QazAqparat - «Astana» halyqaralyq qarjy ortalyǵy (AHQO) men Casablanca Finance City Authority jasyl qarjy men ıslam qarjysyn damytýǵa baılanysty memorandýmǵa qol qoıdy, dep habarlıdy ortalyqtyń baspasóz qyzmeti.
Qujatqa «Astana» halyqaralyq qarjy ortalyǵy basshysy Qaırat Kelimbetov pen Casablanca Finance City Authority Basqarma tóraǵasy Saıd Ibragımı qol qoıdy.
Memorandýmǵa sáıkes, AHQO men Casablanca Finance City Authority kapıtal naryǵy, aktıvterdi basqarý, ıslam qarjylandyrýy, jasyl qarjy, qarjy tehnologııalary men adam kapıtalyn damytý salalarynda birigip jumys isteıdi.
Yntymaqtastyq sheńberinde taraptar aqparatpen, ekspertızamen almasyp, bir-birin Afrıka, TMD naryǵynda ilgeri jyljytýǵa, ǵylymı-bilim is-sharalaryn uıymdastyryp, birge ótkizýge kelisti.
AHQO Basqarýshysy Q.Kelimbetov, sonymen qatar, álemniń ár túkpirinen qarjy ortalyqtaryn óz alańyna jınaǵan «Ornyqty ekonomıka máselelerine arnalǵan qarjy ortalyqtarynyń halyqaralyq jınalysyna» qatysty.
Jıynǵa Eýropa, Azııa, Afrıka, Taıaý Shyǵys qarjy ortalyqtarynyń basshylary, ornyqty damý men jasyl qajy salasyndaǵy halyqaralyq uıymdardyń ókilderi qatysty. Konferentsııaǵa Japonııanyń jasyl qarjy uıymy (Green Finance Organisation of Japan), Japonııanyń jasyl Qory basqarýshy kompanııasy, Z/Yen uıymy (qarjy ortalyqtarynyń básekege qabilettiligi reıtıngin jasaıtyn uıym), sonymen qatar, BUU jaýapty ınvestıtsııa qaǵyıdattary bastamasy, BUU Qorshaǵan orta baǵdarlamasynyń Qarjylyq bastamasy, ornyqty bırjalar boıynsha BUU Bastamasy (SSE), jáne ózgeler qatysty.
Jıyn barysynda aıryqsha kóńil jasyl qarjyǵa bólindi.
«Qorshaǵan orta máselelerine aıryqsha kóńil aýdaratyn Qazaqstan Kıoto hattamasyna eń alǵash ret qol qoıǵan eldiń biri, Parıj kelisimine ratıfıkatsııa jasady. Jasyl qarjyǵa úlken qarjy jumsalýynyń qajettiligine qaramastan, bul sala básekege qabiletti bola alady. Qazaqstan ekonomıkasynyń jańa draıveri Astana «Halyqaralyq qarjy ortalyǵy» osy salada jumys isteıdi jáne óziniń negizgi strategııalyq baǵyty retinde jasyl qarjyny aıqyndady», - dedi Q.Kelimbetov.
AHQO Basqarýshysy konferentsııa qatysýshylaryn AHQO qyzmeti, onyń negizgi damý baǵyttary jáne ınvestorlarǵa degen basymdyqtarynan habardar etti.
Jıyn qorytyndysy boıynsha taraptar «Turaqty damýdy qamtamasyz etý boıynsha qarjy ortalyqtarynyń deklaratsııasyn» (Casablanca Statement on financial centres for sustainability) qabyldady. Deklaratsııa boıynsha taraptar qarjy ortalyqtarynda jasyl qarjylandyrýdy ilgeriletý, osy salada bilimmen bólisý, jasyl aktıvter men ónimderdi keńeıtý boıynsha birlesip qyzmet atqarýǵa kelisti.
