«Astana» qarjy ortalyǵy men Waves blokcheın-platformasy memorandým jasasty
ASTANA. QazAqparat - Davosta (Shveıtsarııa) ótken Dúnıejúzilik ekonomıkalyq forým aıasynda «Astana» halyqaralyq qarjy ortalyǵy men Waves blokcheın-platformasy yntymaqtastyq jáne strategııalyq seriktestik týraly memorandýmǵa qol qoıdy, dep habarlaıdy QazAqparat AHQO baspasóz qyzmetine silteme jasap.
Seriktestik maqsaty - jańa blokcheın-platformany qoldana otyryp, qarjylyq tehnologııalarǵa arnalǵan ozyq ekojúıeni qalyptastyrý.
«Waves platformasymen jumys jasaı otyryp, AHQO qazaqstandyq startaptarǵa óz jobalaryn jańa tehnologııalyq deńgeıde damytýǵa múmkindik beredi, osylaısha atalǵan bastama Qazaqstandaǵy blokcheın-tehnologııalardyń tanymaldyǵyn arttyrýǵa úles qospaq. Mundaı tez damyp kele jatqan, óz salasyndaǵy kóshbasshy kompanııalarmen seriktestik ornatý AHQO úshin blokcheın tehnologııasy elementterin paıdalanyp, qarjylyq qyzmetter ındýstrııasyna jańa, tyń sheshimder ázirleýde quzyrettilik pen kásibı mamandardy daıarlaýda orasan zor basymdyqtar beredi» - dep atap ótti AHQO-nyń tsıfrlyq tehnologııalar jónindegi dırektory Ásel Jıenbaeva.
Waves Platform negizin qalaýshy jáne SEO Aleksandr Ivanov: «Biz ózara seriktestigimiz Qazaqstanǵa blokcheın-tehnologııalar salasyndaǵy eń ozyq tájirıbeni engizýge múmkin berip, AHQO-ny álemdegi atalmysh ındýstrııanyń aldyńǵy qatarly ınnovatsııalyq ortalyqtarynyń birine aınaldyraryna senimdimiz. Bizdiń seriktestigimiz aıasynda jınaqtalǵan tájirıbeniń arqasynda biz sondaı-aq úzdik sheshimderdi, bilim men tehnologııany keńinen tarata alamyz, bul TMD-daǵy búkil blokcheın-ekojúıeni damytýǵa oń áserin tıgizbek» - dep atap ótti.
Sonymen qatar taraptar qarjylyq jáne blokcheın tehnologııalary salasyndaǵy startap-kompanııalarǵa qoldaý kórsetýge jáne olarǵa Waves blokcheın-sheshimderin paıdalanýǵa jol ashýǵa, sondaı-aq AQHO-nyń akseleratsııalyq baǵdarlamasy alańyna sheteldik startaptardy tartýǵa jáne oqytyp-úıretý is-sharalaryn ótkizýge nıetti ekendikterin bildirdi.
Eske sala ketsek, 2015 jylǵy jeltoqsan aıynda Qazaqstan Respýblıkasynyń Prezıdenti Nursultan Nazarbaev «Astana» halyqaralyq qarjy ortalyǵyn (AHQO) qurý týraly Konstıtýtsııalyq zańǵa qol qoıdy. AHQO-nyń maqsaty qarjylyq qyzmetterdi kórsetetin halyqaralyq deńgeıdegi jetekshi ortalyq qalyptastyrý bolyp tabylady. Postkeńestik keńistikte tuńǵysh ret aǵylshyn quqyǵynyń qaǵıdattary engiziledi, qarjy ortalyǵynyń resmı tili - aǵylshyn tili bolady.
AHQO-nyń mindetteri qarjylyq qyzmetter salasynda ınvestıtsııalaý úshin tartymdy orta qurý arqyly el ekonomıkasyna ınvestıtsııalar tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý. AHQO sondaı-aq elimizde saqtandyrý, bank qyzmetteri men ıslamdyq qarjylandyrý naryǵyn damytýǵa nıettenedi. www.aifc.kz
Al, Waves Platform (https://www.wavesplatform.com/) - bul bızneske, uıymdar men ınvestorlarǵa arnalǵan ınnovatsııalyq sheshimderdi usynatyn halyqaralyq blokcheın-platforma. Waves blokcheınde emıssııany, saýda júrgizý jáne aktıvterdi/óz tokenderin aıyrbastaýdy júzege asyrady. Jobanyń negizgi erekshelikteriniń biri - qoldaný jeńildigi men jappaı engizýge basa kóńil bólýde. Bátýalastyq algorıtmi retinde munda Proof-Of-Stake qoldaný usynylady. 2016 jyldyń maýsym aıynda Waves ICO-ny (Initial Coin Offering - monetalardy jarııa satýdy) sátti aıaqtap, nátıjesinde $16 mln dollar (30 000 VTS) jınady.
