«Astana» qarjy ortalyǵy krıptovalıýtany qalaı saýdalaıdy
ASTANA. QazAqparat - Bas kezinde ataǵan bastama testilik úlgide bolady. Ol úshin «Astana» Halyqaralyq qarjy ortalyǵyna arnalǵan zańnamaǵa birqatar ózgerister engiziledi, dep xabarlaıdy QazAqparat tilshisi.
«Qazir bizde krıptovalıýtalar naryǵyn retteıtin zań joq. Biraq aldaǵy ýaqytta «Astana» Halyqaralyq qarjy ortalyǵy týraly» zańǵa ózgeris engizip, tek ortalyq aımaǵynda ǵana krıptovalıýtalarǵa arnalǵan jobalardy iske asyryp kórmekpiz. Ol testilik alań bolady. Sonyń negizinde krıptovalıýtalardy saýdalaıdy. Biraq bunyń barlyǵy ázirshe tájirıbe úlgisinde bolady», - dedi «Astana» HQO-nyń tsıfrlyq texnologııalar boıynsha dırektory Ásel Jıenbaeva QazAqparat tilshisine bergen suxbatynda.
Onyń aıtýynsha, elektrondy aqsha sııaqty tsıfrlyq texnologııalardan qashpaý qajet. Aldymen ony synap kórgen jón. Sóıtip, qolaıly zańnamany qabyldap, iske asyrý - qazirgi zaman talaby. «Negizi, krıptovalıýtalardyń bolashaǵy bar. Bul «ekinshi ınternet» ispetti. Máselen, kezinde ınternet te solaı bastaldy. «Bıtkoın» krıptovalıýtanyń birinshi úlgisi deýge bolady. Aldaǵy ýaqytta osy baǵytta kúrdeli ózgerister bolady», - dep atap kórsetti Á.Jıenbaeva.
Aıta keteıik, búgin Úkimet úıinde ótken baspasóz máslıxatynda «Astana» Halyqaralyq qarjy ortalyǵynyń basqarýshysy Qaırat Kelimbetov EKSPO aımaǵynda qurylatyn bırjada krıptovalıýtalar sııaqty jańa qarjy texnologııalardyń bolatynyn málimdedi. «Bylaısha aıtqanda, qazirgi EKSPO aımaǵy bolashaqta «krıptoaılaqqa» aınalady degen senim bar» , - dedi Q.Kelimbetov.
