Astana qarjy ortalyǵy Qazaqstan ekonomıkasyna ne beredi - Qaırat Kelimbetovtiń jaýaby
ASTANA. QazAqparat - Otandyq jáne sheteldik BAQ aldynda baspasóz máslıhatyn ótkizgen «Astana» Halyqaralyq qarjy ortalyǵynyń basqarýshysy Qaırat Kelimbetov atalǵan ortalyqtyń Qazaqstan ekonomıkasyna ne beretini týraly saýalǵa jaýap berdi, dep habarlaıdy «QazAqparat» HAA tilshisi.
«Astana Halyqaralyq qarjy ortalyǵy eń aldymen tikeleı sheteldik ınvestıtsııalardy tartady. Ózderińiz biletindeı, Qazaqstan ekonomıkasy sońǵy 10-15 jylda óte joǵary qarqynda damydy. Osy aralyqta 200 mlrd AQSh dollaryna jýyq shetelden ınvestıtsııa tarttyq. Al osy ınvestıtsııalar kóp jaǵdaıda tabıǵı resýrstarǵa tartylǵan bolatyn. Búgin bizge ońtaıly sektorlarǵa áli de tartyp jatyrmyz. Sondyqtan, Astana HQO eń aldymen sheteldik ınvestıtsııalardy tartýdaǵy «tereze» ispettes. Sáıkesinshe ekonomıkamyz damyp, ulttyq valıýtamyz turaqty bola túsedi», - dedi Qaırat Kelimbetov.
Eske sala ketsek, QR Prezıdenti Nursultan Nazarbaevtyń bastamasymen qurylǵan AHQO uzaq merzimdik damýǵa baǵyttalǵan bes ınstıtýtsıonaldyq reformany júzege asyrýǵa arnalǵan «100 naqty qadam» Ult josparynyń bóligi. AHQO-nyń arnaıy mártebesi QR Konstıtýtsııalyq zańymen zańdy túrde bekitilgen. TMD elderi arasynda tuńǵysh ret aǵylshyn saýda quqyǵy qaǵıdattary men álemdik beldi qarjy ortalyqtarynyń talaptaryna sáıkes (London, Nıý-Iork, Gongkong, Sıngapýr, Dýbaı jáne t.b) qurylǵan ózindik quqyqtyq arnaıy quzirettik aýmaq AHQO-da qurylmaq. AHQO bazasynda álemdik myqty talaptarǵa saı joǵary tehnologııalyq jańa bırja iske qosylatyn bolady. AHQO-nyń negizgi strategııalyq damýy kapıtal naryqtaryn damytý, aktıvterdi basqarý, jeke tulǵalardyń dáýletin basqarý, ıslamdyq qarjylandyrý, qarjylyq tehnologııa sekildi baǵyttardy qamtıdy.
