«Astana» qarjy ortalyǵy EKSPO aımaǵyna qashan kóshedi
ASTANA. QazAqparat - Qazirgi kezde EKSPO aýmaǵyndaǵy pavılondardy qaıta qurý jumystary júrgizilip jatyr. Oǵan biraz ýaqyt ketedi, dep habarlaıdy QazAqparat tilshisi.
«Astana» HQO basqarýshysy Qaırat Kelimbetovtiń aıtýynsha, aldaǵy ýaqytta 3-shi jáne 4-shi pavılondarda qarjy ortalyǵynyń ujymy ornalasady.
«Alaıda biz jyldyń aıaǵyna qaraı kóshetin shyǵarmyz. Sebebi búginde «Astana EKSPO» ulttyq kompanııasy pavılondardy qaıta qurýmen aınalysyp jatyr. Kompanııanyń aqparatyna sáıkes, bul jumystardy aıaqtaýǵa shamamen 9-12 aı ketedi. Dál qazir «Izýmrýdnyı kvartalda» (Qonaev kóshesi boıynsha bıznes ortalyq - avt.) otyrmyz», - dedi Q.Kelimbetov Úkimet úıinde ótken baspasóz máslıhatynda.
Onyń aıtýynsha, qarjy ortalyǵynyń terrıtorııasy 1600 gektarǵa deıin keńeıdi.
«Demek, «Astana» halyqaralyq qarjy ortalyǵy sol jaǵalaýdyń biraz bóligin alyp otyrady. Onyń terrıtorııasynda bıznes ortalyqtar jáne taǵy basqa nysandar bolady», - dep atap kórsetti Qarjy ortalyǵynyń basshysy.
Aıta keteıik, búgingi baspasóz máslıxatynda Q.Kelimbetov qarjy ortalyǵynyń shtaty týraly aıtyp berdi. Onyń aıtýynsha, ortalyq jumystyn uıymdastyrý men júrgizýge bıýdjetten qyrýar qarjy bólinedi. Budan bólek, Qaırat Nematuly krıptovalıýtaǵa qatysty keńes berdi. Aǵymdaǵy jyly 5 shildede «Astana» HQO-nyń resmı tusaýkeserin ótkizý josparlanyp otyr.
