«Astana» qarjy ortalyǵy EAEO ekonomıkasyna ınvestıtsııa tartýdyń generatoryna aınalady - Prezıdent

NUR-SULTAN. QazAqparat - «Astana» halyqaralyq qarjy ortalyǵy Eýrazııalyq ekonomıkalyq odaq ekonomıkasyna ınvestıtsııa tartýdyń generatoryna aınalady. Bul týraly Qazaqstan Prezıdenti Qasym-Jomart Toqaev «Rossııskaıa gazeta» basylymyna bergen suhbatynda aıtty, dep habarlaıdy QazAqparat tilshisi.

«Astana» halyqaralyq qarjy ortalyǵyn keleshekte óńirde Dýbaı, Gonkong, Sıngapýr, Shveıtsarııa nemese Londondaǵy qarjy ortalyqtary sııaqty ról atqara alatyn Eýrazııadaǵy perspektıvaly qarjy haby retinde qarastyramyz. AHQO qazirdiń ózinde iri halyqaralyq bankterdiń, ınvestıtsııalyq kompanııalardyń tartylys ortalyǵyna aınaldy. Aktıvterdi, qorlardy basqarý, jańa qarjylyq jáne jasyl tehnologııalardy engizý - ortalyq qyzmetiniń mańyzdy baǵyttary. Álemdik qor jáne valıýta bırjalaryndaǵy týrbýlenttilik jaǵdaıynda AHQO Eýrazııalyq ekonomıkalyq odaq elderiniń ekonomıkasy men qarjy sektoryna ınvestıtsııa tartýdyń generatoryna aınalady», - dedi Q.Toqaev.

Qazaqstan Prezıdentiniń atap ótýinshe, halyqaralyq ınvestorlar úshin ortalyqta qoldanylatyn brıtandyq quqyq qaǵıdatyna negizdelgen derbes quzireti bar aıryqsha quqyqtyq rejim tartymdy. AHQO táýelsiz soty men Halyqaralyq arbıtraj ortalyǵy azamattyq jáne kommertsııalyq daýlardy sheshýde úzdik halyqaralyq tájirıbeni basshylyqqa alady.

«Ortalyq jáne onyń aıasynda qurylǵan bırja reseılik bıznes, TMD elderi, sonymen qatar búkil Batys jáne Ortalyq Azııa óńiri úshin tartymd qarjy habyna aınalady dep senemiz. Bul jerde eýrazııalyq óńir kompanııalary úshin naryqtyń arnaıy segmenti qurylyp, Jibek jolyn órkendetý boıynsha birqatar joba júzege asyrylatyn bolady», - dedi Memleket basshysy.