Astana-Qaraǵandy tórtqatarly jolynyń qurylysyna aldaǵy kúzde konkýrs ótkiziledi - Kólik jáne kommýnıkatsııa mınıstri

QARAǴANDY. Tamyzdyń 3-i. QazAqparat /Valentına Elızarova/ - Kólik jáne kommýnıkatsııa mınıstrligi aǵymdaǵy jyldyń kúzinde Astana-Qaraǵandy tórtqatarly jolynyń qurylysyna konkýrs ótkizýdi josparlap otyr. Bul týraly QazAqparat tilshisine mınıstr Ábilǵazy Qusaıynov Qaraǵandy oblysynda salynatyn avıazaýyt qurylysynyń irgetasyn qalaý rásiminen keıin aıtty.

«Biz aǵymdaǵy jyldyń kúzinde kontsessııalyq jobaǵa tender ótkizetin bolamyz. Eger ol jaqsy ótse, kelesi jyly joldyń qurylysyn bastap qalamyz degen oıdamyz»,- dedi mınıstr óz sózinde. Bul másele qazan-qarasha aılarynda sheshimin taýyp qalady, - dep naqtylady ol.

Esterińizge sala keteıik, Astana-Qaraǵandy tórtqatarly jolynyń qurylys jobasy týraly osydan bir jyldaı buryn málim etilgen bolatyn. Ótken jyldyń jeltoqsan aıynda Qaraǵandy oblystyq ákimdiginde kólik mınıstriniń qatysýymen ótken jáne aımaqtyń kólik ınfraqurylymyn damytý máseleleri talqylanǵan keńeste jobanyń júzege asyrylý merzimin tezdetý týraly kelisimge qol jetkizilgen bolatyn. Sol joly mınıstr Á.Qusaıynov konkýrstyq amaldardy 2010 jyldyń І jartyjyldyǵynda ótkizý jospary týraly aıtqan edi.

«Barlyq tıisti qujattar bar. Mınıstrlik tórtqatarly Astana-Qaraǵandy tas jolyn qaıta jańartý jobasyn kontsessııalyq negizde júzege asyrý baǵytynda belsendi jumys júrgizip keledi jáne 2010 jyly barlyq máseleler sheshimin taýyp qalady», - dep málim etti vedomstvo basshysy QazAqparat tilshisine bergen suhbatynda.