«Astana-Qaraǵandy» tas jolyndaǵy jappaı kólik apatynyń sebebi anyqtaldy
ASTANA. QazAqparat - Búgin «Astana-Qaraǵandy» tas jolynda jappaı kólik apaty boldy. Aqmola oblysy ІІD baspasóz qyzmeti «QazAqparat» agenttigine apattyń neden bolǵanyn málim etti.
Oblystyq ІІD baspasóz qyzmetiniń basshysy Gúlnár Pınchýktiń habarlaýynsha, Arshaly kentine 10 shaqyrym qalǵanda Astana-Qaraǵandy baǵytynda júrip bara jatqan KamAz júk kóligi alda týyndaǵan kedergige baılanysty artqa qaraı burylmaq bolǵan. Osy kezde oǵan jeńil kólik kelip soqtyǵysqan.
Apatqa ushyraǵan kólikterdiń naqty sany ázirge belgisiz. Aldyn ala derek boıynsha kemi 15 kólik soqtyǵysqan.
Qaza bolǵandar joq. Jaraqat alǵandar Arshaly aýdandyq aýrýhanasyna jetkizilgen.
Aıta keteıik, buǵan deıin apat bolǵan jerde kýágerler túsirgen vıdeony jarııalaǵan bolatynbyz . Beınerolıkti «QazAqparat» agenttigine kýágerler joldady.
