Astana – Qaraǵandy tasjolynda júk kóligi apatqa ushyrady
ASTANA. KAZINFORM – Astana – Qaraǵandy tasjolynda júk kóliginiń qatysýymen jol-kólik oqıǵasy bolyp, qozǵalys birneshe saǵatqa qıyndady, dep habarlaıdy QazAvtoJol.
Oqıǵa 10 shilde kúni shamamen saǵat 16:30-da Astana – Qaraǵandy avtomobıl jolynyń 42-shaqyrymynda bolǵan.
Aldyn ala málimet boıynsha, júrgizýshi kólik tizginine ıe bola almaı, júk kóligi jol jıegindegi qorshaýǵa soǵylǵan. Sonyń saldarynan atalǵan ýchaskede qozǵalys qıyndap, kólik keptelisi paıda boldy.
– Jol qyzmetteri oqıǵa ornyna jedel jetti. Júrý bóligin tazartý, apat saldaryn joıý jáne qozǵalysty qaýipsiz qaıta ashý úshin qajetti jumystar júrgizildi. Saǵat 20:30-da kólik qozǵalysy tolyq qalpyna keltirildi, – dep habarlady «QazAvtoJol» kompanııasynan.
Mamandar mundaı jaǵdaılarda júrgizýshilerdi jol qaýipsizdigi talaptaryn saqtaýǵa shaqyrady. Atap aıtqanda, keptelisti jol jıegimen aınalyp ótpeý, jyldamdyqty aldyn ala tómendetý jáne qaýipsiz araqashyqtyq saqtaý mańyzdy ekenin eskertedi.
Sondaı-aq arnaıy jáne jol qyzmetteri júretin jolaqty bos qaldyryp, ýaqytsha belgiler men mamandardyń nusqaýyn oryndaý qajet.
– Foto nemese beıne túsirý úshin toqtamańyz. Túsirilim jasaý maqsatynda jyldamdyqty azaıtý qosymsha keptelis týdyryp, qaıtalama apat qaýpin arttyrady, – dep eskertti mamandar.
«QazAvtoJol» jol-kólik oqıǵasynan keıingi qaýipsizdik pen qozǵalystyń tez qalpyna kelýi tek arnaıy qyzmetterdiń jumysyna ǵana emes, árbir júrgizýshiniń jaýapkershiligine baılanysty ekenin atap ótti.
Aıta keteıik, Jetisý oblysynda jyl basynan beri 500-den astam jol apaty tirkeldi.
